Aleksandr Nedovesov Meksıkada jarystyń 1-raketkasyn utyp, jartylaı fınalǵa shyqty

ASTANA. KAZINFORM – Qazaqstannyń juptyq syndaǵy birinshi raketkasy Aleksandr Nedovesov Los-Kabos (Meksıka) ATP 250 týrnıriniń jartylaı fınalyna shyqty. Qazaqstandyq tennısshi ekvadorlyq Gonsalo Eskobarmen birge shırek fınalda osy jarystyń 1-raketkalary, ulybrıtanııalyq Nıl Skýpskı – meksıkalyq Santıago Gonsalesqa qarsy keldi.

Birinshi partııada ulybrıtanııalyq-meksıkalyq jup 6:3 esebimen basym túskenimen, A.Nedovesov – G.Eskobar kambek jasaı aldy – 7:6 (7:2), 10:6.

Bir saǵat 50 mınýtqa sozylǵan tartysty matchta qazaqstandyq-ekvadorlyq dýet 1 eıs, 2 breıkke (4 breık-poınt) qol jetkizdi. Qarsylastary 4 eıs jasap, 4 breık-poınttyń úsheýin paıdalandy.

Aleksandr Nedovesov – Gonsalo Eskobar fınalǵa shyǵý úshin taǵy bir meksıkalyq Mıgel Anhel Reıes-Varela – argentınalyq Gvıdo Andreotstsımen talasady. 
Eske sala keteıik, budan buryn qazaqstandyq tennısshiniń AQSh-taǵy týrnırdiń shırek fınalyna ótkenin jazǵan bolatynbyz.