Aleksandr Nedovesov Horvatııadaǵy jarystyń jartylaı fınalyna shyǵa almady

ASTANA. QazAqparat – Qazaqstannyń juptyq syndaǵy birinshi, álemniń 45-raketkasy Aleksandr Nedovesov Ýmag (Horvatııa) ATP 250 týrnıriniń jartylaı fınalyna shyǵa almady, dep habarlaıdy QazAqparat tilshisi.

Qazaqstandyq tennısshi ekvadorlyq Gonsalo Eskobarmen birge shırek fınalda slovenııalyq Blaj Rola – horvatııalyq Nıno Serdarýshıchpen sheberlik baıqasty.

Birinshi partııada slovenııalyq-horvatııalyq jup 6:2 esebimen basym tússe, ekinshisinde A.Nedovesov pen G.Eskobar ese qaıyrdy – 6:3. Sýper taı-breıkte jeńis slovenııalyq-horvatııalyq dýettiń enshisinde ketti – 10:8.

Taǵy bir qazaqstandyq, reıtıngte 270-orynda turǵan 22 jastaǵy Beıbit Juqaev Salınastaǵy (Ekvador) chellendjer dodasynda álemniń 222-raketkasy, frantsııalyq Djovannı Mpeshı-Perrıkarmen úsh saǵattan astam ýaqytqa sozylǵan shırek fınaldyq kezdesýin ótkizdi. Munda frantsııalyq tennısshi 7:6 (11:9), 6:7 (6:8), 6:4 esebimen utyp ketti.

Osylaısha, Beıbit Juqaev ta jartylaı fınaldan tys qaldy.

Eske sala keteıik, budan buryn Anna Danılınanyń Gambýrg týrnıriniń fınalyna shyqqanyn jazǵan bolatynbyz.