Aleksandr Maslıakovtan shaqyrtý alǵan «Saǵyz» komandasy Sochıge attandy
ATYRAÝ. QazAqparat – Atyraý oblysynyń «Saǵyz» komandasy KVN halyqaralyq odaǵynyń prezıdenti Aleksandr Maslıakovtan shaqyrtý alyp, Sochı qalasyna attandy, dep habarlaıdy QazAqparat.
Sochıde 11-22 naýryzda «KıVıN-2021» kóńildi tapqyrlar klýby komandalarynyń 32-shi halyqaralyq festıvali ótip jatyr. Atalǵan festıvalǵa «Saǵyz» komandasy bes oıynshymen qatysady. Olarǵa oblys ákimdigi men jergilikti kásipker demeýshilik kómek kórsetti.
«Bizde azdaǵan qobaljý bar. Óıtkeni, sahnada alǵash ret orys tilinde óner kórsetemiz. Degenmen, bizdiń komanda 12 jyldan beri sahnada óner kórsetip, biraz tájirıbe jınady. Reseılik kóńildi tapqyrlar klýbynda óner kórsetý ár komandanyń músheleriniń armany ǵoı. Bul – bizdiń besinshi talpynysymyz. Buǵan deıin qarjynyń joqtyǵynan Reseıge bara almap edik», -deıdi «Saǵyz» komandasynyń negizin qalaýshy Ernar Sakýpov.
Onyń aıtýynsha, komanda músheleriniń deni Qyzylqoǵa aýdanyndaǵy Saǵyz aýylynyń jastarynan quralǵan. Bul komanda birneshe ázil-syqaq shoý-baǵdarlamasynyń birneshe dúrkin jeńimpazy bolǵan. Sondaı-aq, «Kóńildi tapqyrlar alańy» jastar jobasynyń chempıony atanǵan. Endi komanda músheleriniń alǵa qoıǵan maqsaty – aldymen Krasnodar óńirlik lıgasyna, sonan soń Reseıdiń birinshi lıgasyna kirý.
