Aleksandr Lýkashenko ShYU-nyń ujymdyq qarjy ınstıtýtyn qurýdy usyndy
ASTANA. KAZINFORM — Belarýs basym másele retinde ulttyq valıýtadaǵy ekijaqty tólem mehanızmin qurýdy qarastyrady. Bul týraly elordadaǵy Táýelsizdik saraıynda Shanhaı yntymaqtastyq uıymy sammıti aıasynda ótip jatqan «ShYU+» kezdesýinde Belarýs Prezıdenti Aleksandr Lýkashenko aıtty.
«Eýrazııa qurlyǵyndaǵy túrli ıntegratsııalyq úderisterge kóbirek kóńil bólý qajet. Ótkende qazir dúnıe abdyrap, tas qarańǵyda qalǵandaı kúı keshkenin aıtqan bolatynmyn. Bas hatshynyń sózi ǵalamsharymyzdyń qaterli damý keleshegindegi daý-damaı men qaýipti rastaıdy. Adamdar qandaı da bir baǵdar men aıqyndyqty kútedi. ShYU muny isteı alady. Biraq, muny tez jasaý kerek. Óıtkeni ýaqyt tyǵyz. Qazir ekinshi dúnıejúzilik jáne qyrǵı-qabaq soǵystan keıingi jaǵdaı sııaqty emes. Ýaqyt jyldam áreketti talap etedi, ony tez jasaǵanymyz durys», — dedi Aleksandr Lýkashenko.
Onyń atap ótýinshe, postkeńestik keńistikte odaqtas memleketter, Eýrazııa ekonomıkalyq odaǵy, UQShU, TMD aıasynda belsendi ıntegratsııa júrip jatyr. Ózge de eýrazııalyq birlestikter — ASEAN, Islam yntymaqtastyǵy uıymy, Islam memleketteri lıgasy qarqyn alyp keledi.
Infraqurylym jobalaryna baılanysty mańyzdy bastamalar júzege asyp jatyr. Olardyń qatarynda Qytaıdyń «Bir beldeý, bir jol», Reseıdiń Soltústik baǵyt jobalary bar.
«ShYU-nyń jan-jaqty kún tártibiniń praktıkalyq ózara is-qımylyn kúsheıtý kerek. Qarjydan bastaýdy usynamyn. Belarýs basym másele retinde ulttyq valıýtadaǵy ekijaqty tólemder mehanızmin jáne ShYU-nyń ujymdyq qarjy ınstıtýtyn qurýdy qarastyrady. Bárimiz alyppyz, ulymyz deımiz. Iá, biz shynymen de ulymyz. Bizdiń halqymyzdyńm úlesi - shamamen 40 paıyz, jalpy ishki ónimniń úshten biri bizde. Al dollardyń aldynda bárimizdiń tizemiz dirildeıdi. Osy dollarǵa barynsha azyraq táýeldi bolý úshin belgili bir qadam jasaıyq», — dedi Belarýs Prezıdenti.
