Aleksandr Lýkashenko Qazaqstandy munaı boıynsha kelissózderdi jandandyrýǵa shaqyrdy
MINSK. QazAqparat - Belarýs Qazaqstannan tasymaldanatyn munaı boıynsha kelissóz júrgizip, osy baǵyttaǵy baılanysty jandandyrýǵa nıetti.
Bul týraly Belarýs Prezıdenti Aleksandr Lýkashenko Qazaqstannyń Belarýstaǵy Tótenshe jáne Ókiletti elshisi Ermuhamet Ertisbaevpen kezdesýinde málim etti, dep habarlaıdy QazAqparat tilshisi BELTA-ǵa silteme jasap.
«Qazirgi ýaqytta biz kómirsýtek shıkizatyn tasymaldaýdyń ártaraptandyrýmen aınalysyp jatqanymyzdy biletin bolarsyzdar. Bizde birneshe nusqa bar. Belarýs basqa jerden de munaı tasymaldaý baǵytynda kelissózder júrgizý ústinde. Bıyl munaı óńdeıtin zaýyttardy jańǵyrtý jumysyn aıaqtaımyz. Sol sebepti, bizge álemdik naryqtan munaıdy satyp alý jeńildeı túsedi. Bul baǵyttaǵy kelissózderdi bastap kettik te. Endi Belarýsqa qazaqstandyq munaıdy jetkizý boıynsha kelissóz jandansa deımiz. Bul máseleni sheshe alatyn sekildimiz. Ol Belarýs pen Qazaqstannyń ǵana kelissózimen sheshilmesi anyq. Ortada Reseı tranzıti jatyr. Reseı - EEEO múshesi. Bizge jaqyn elmen Qazaqstan munaıynyń belgili bir bóligin tasymaldaý baǵytynda kelisip alatyn sekildimiz», - dedi Aleksandr Lýkashenko.
Belarýs basshysy Qazaqstan pen Belarýs arasyndaǵy saýda-ekonomıkalyq qarym-qatynasta eshqandaı másele joqtyǵyn atap ótti.
«Belarýs baǵytyndaǵy saýdada dısbalanstyń bary qupııa emes. Biraq, Qazaqstanda bizge kerekti taýarlardyń túr-túrin shyǵaratynyn bilýińiz kerek. Maqtadan bastap metallǵa deıingi qajettilikterdiń bári kerek. Biz KSRO kezindegideı Sizderden bıdaı satyp alýǵa daıynbyz. Sol sebepti, saýda jaǵynan balansty rettep alý asa qıynǵa soqpaıdy. Bizdiń Úkimetaralyq komıssııaǵa osy máselemen aınalysýdy tapsyrý kerek degen oıdamyn», - deıdi ol.
Aleksandr Lýkashenkonyń aıtýynsha, eki memleket pen elderdiń basshylary arasynda qashan da izgi qarym-qatynas saqtalǵan.
«Biz Belarýs pen Qazaqstan arasynda aıtarlyqtaı myqty qarym-qatynas júıesin ornattyq. Taýar aınalymy jaǵynan mıllıardtyq kórsetkishke qol jetkizdik. Áleýet barshylyq», - deıdi Aleksandr Lýkashenko.
Belarýs Prezıdenti óz sózinde ekijaqty qarym-qatynastyń bekemdele túsýine «Bir beldeý - bir jol» qytaılyq baǵdarlamasy yqpal etetinin tilge tıek etti.
Aıta keterligi, ótken jyly eki el arasyndaǵy taýar aınalymy 900 mln dollarǵa jetken bolatyn. Bul 2017 jyldyń kórsetkishimen salystyrǵanda 30 paıyzǵa kóp. Bul rette belarýstyq eksporttyń mólsheri 783 mln dollarǵa jetken edi. 2019 jyldyń alǵashqy toqsanynda eki eldiń arasyndaǵy saýda qarym-qatynasy 10 paıyzǵa azaıǵan bolatyn.
Belarýs óz kezeginde munaı ónimderin, tas kómirdi, relster men maqta, sarymsaq ımporttap otyr. Qazirgi ýaqytta Qazaqstanda 40-qa tarta Belarýs kompanııasy jumys istep tur.
