Aleksandr Lýkashenko Qazaqstan elordasynyń damý qarqynyn oń baǵalady
ASTANA. 24 mamyr. QazAqparat /Rýslan Ǵabbasov/ - Belarýs Prezıdenti Aleksandr Lýkashenko Qazaqstannyń elordasy - Astananyń damý qarqynyn oń baǵalady. Ol bul oıyn búgin Aqordada Elbasy Nursultan Nazarbaevpen ótkizgen keńeıtilgen quramdaǵy kelissózder barysynda aıtty.
«Qazaqstan elordasyn aýystyrý jónindegi ózińizdiń sheshimińizdi is júzinde júzege asyrdyńyz. Búginde Astanada barlyq qajetti ınfraqurylymdar quryldy. Sizder qazirgi kezde elorda men memleketterińizdi turaqty damý jolyna qoıdyńyzdar»,-dedi A. Lýkashenko.
Munymen qosa, Belarýs basshysy Elbasyn ótken prezıdenttik saılaýdaǵy jeńisimen quttyqtady. «Qazaqstan halqy biraýyzdan óziniń Elbasyn qoldady. Osy oraıda bizdiń, Belarýs tarapynyń quttyqtaýyn qabyl alyńyz»,-dedi A. Lýkashenko Elbasy N. Nazarbaevqa qaratyp aıtqan sózinde.
