Aleksandr Lýkashenko: Belarýs Ózbekstandaǵy AES qurylysyna járdemdesýge daıyn

TAShKENT. KAZINFORM – Belarýs Ózbekstannyń AES salý jobasyn iske asyrýda strategııalyq seriktes bolýǵa daıyn. Bul týraly Mınsk qalasynda kórshiles eldiń elshisi Rahmatýlla Nazarovpen kezdesken prezıdent Aleksandr Lýkashenko málimdedi, dep habarlaıdy Kazinform agenttiginiń Tashkenttegi menshikti tilshisi.

Kezdesýde taraptar ekijaqty yntymaqtastyqtyń basym baǵyttaryn talqylap, atom energetıkasy salasyndaǵy yntymaqtastyqqa toqtaldy. Belarýs prezıdenti jınaqtalǵan tájirıbe negizinde tehnologııalarmen bólisip, kadr daıarlaýǵa járdemdesýge nıetti ekenin aıtty.

— Biz Reseımen seriktestikte AES salý jumystaryna qatysyp júrmiz. Eger bizdiń tájirıbege qyzyǵýshylyq tanytsańyzdar, onda kez kelgen ýaqytta kelińizder. Bizdiń qyzmetkerler ózbek tarapynyń mamandarymen sóılýge daıyn. Biz AES qurylysyna járdemdesemiz, - dedi Aleksandr Lýkashenko.

Belarýs AES-ti jobalaýdan bastap, energııa bloktaryn paıdalanýǵa bergenge deıingi kezeńderdiń barlyǵynda kómek kórsetýge ázir. Mınskiniń qoldaýy Ortalyq Azııadaǵy alǵashqy AES-ti qurý protsesin jedeldetýge yqpal etpek.

Eske salaıyq, Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etpek.

Sondaı-aq taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik.

23 jeltoqsanda Ózbekstanda AES qurylysy boıynsha qoǵamdyq tyńdaý ótti.