Aleksandr Kýznetsovqa izdeý jarııalandy
ALMATY. QazAqparat - Bostandyq aýdandyq sotynda «Chýkotka» baryndaǵy tóbeleste adam óltirgeni úshin sottalǵan Aleksandr Kýznetsovqa izdeý jarııalandy, dep habarlaıdy QazAqparat tilshisi.
Munyń aldynda Bostandyq aýdandyq № 2 sotyna Bostandyq aýdandyq ІІB-nen Aleksandr Kýznetsovqa izdeý jarııalaý týraly ótinish túsken bolatyn.
Polıtsııanyń ótinishin memlekettik aıyptaýshy Erlan Qulanbaev qoldady. Qos taraptyń pikirin estigen soń sýdıa keńesý bólmesine shyǵyp ketti.
«Bostandyq aýdany ІІB basshysynyń A.Kýznetsovqa izdeý jarııalaý týraly ótinishi qanaǵattandyrylsyn. A.Kýznetsovqa izdeý jarııalansyn», - dedi sýdıa Temirjan Qudabaev.
Esterińizge sala keteıik, 2015 jyly «Chýkotka» barynyń aldyndaǵy tóbeles kezinde Syrym Muratqalıev kóz jumǵan bolatyn. Sol jyldyń maýsymynda birinshi ınstantsııa soty aıyptalýshy Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrdy.
Keıinirek, Almaty qalalyq sotynyń apellıatsııalyq kollegııasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrdy.
A.Kýznetsov jazasyn Almaty túbindegi Zarechnyı aýylyndaǵy túrmede ótep jatqan edi.
2018 jyldyń 2 shildesinde Aleksandr Kýznetsov túrmeden bosap shyqty. Sot onyń ótelmegen 5 jylyn aıyppulmen jabý týraly sheshim qabyldady.
Keıin Almaty oblystyq sotynyń apellıatsııalyq kollegııasy adam óltirgeni úshin isti bolǵan Kýznetsovty kolonııaǵa qaıtarý jóninde sheshim shyǵardy.
Sot úkimi shyǵatyn kúni Aleksandr Kýznetsovtyń Qazaqstan aýmaǵynan ketip qalǵany belgili boldy.
