Aleksandr Kosachev «Taldyqorǵan bórisi» atandy

TALDYQORǴAN. QazAqparat -  Taldyqorǵanda qala ákiminiń júldesi úshin qazaq kúresinen ótkizilgen «Taldyqorǵan bórisinde» Aleksandr Kosachev  jeńimpaz atandy. Endi balýan  oblystyq «Jetisý bórisi» týrnırinde «Qazaqstan barysyna» joldama alý úshin kúsh synasady, dep habarlaıdy QazAqparat tilshisi.  

Bıylǵy básekege  20   balýan qatysty. Bul jerdegi 20 sany kezdeısoq tańdalmaǵan  eken. «Astana qalasynyń 20 jyldyǵyna oraı osyndaı tartý  jasadyq»,  - deıdi qalalyq ákimdiktiń baspasóz qyzmeti.

Týrnırde úshinshi oryndy Shyńǵys Saılaýuly, ekinshi oryndy Ádilbaı Álisher ıelense, birinshi oryndy Aleksandr Kosachev qanjyǵalady.

Al Erlan Toıbaev «Jeńiske degen jigeri úshin», Ernar Abdrahmanov «Úzdik ádis kórsetkeni úshin» nomınatsııasymen marapattaldy.

Eki aptadan keıin ótetin oblystyq «Jetisý bórisinde» Aleksandr Kosachev pen Ulan Rysqul shyǵyp, baqtaryn synaıdy. Ulan Rysqul byltyrǵy «Qazaqstan barysynyń» kúmis belbeý ıegeri atanǵany úshin bıylǵy qalalyq irikteýden bosatyldy.

Aıta ketý kerek, Aleksandr Kosachev byltyr da «Taldyqorǵan bórisi» atanǵan bolatyn.