Aleksandr Kolıadınniń batyldyǵyna qaıran qalamyn - bapker

QOSTANAI. QazAqparat - Phenchhandaǵy Paralımpıadada altyn medaldy jeńip alǵan Aleksandr Kolıadınniń shańǵymen aınalysqanyna 7 jyl boldy. Sportshynyń jeńisti joly týraly QazAqparat tilshisine bapkeri Anatolıı Poıskovoı aıtyp berdi.

Negizi Aleksandr Kolıadın sport mansabyn kúresten bastaǵan. Alaıda, 1997 jyly ol kólik apatyna túsip oń aıaǵynan aıyryldy.

«Kolıadın shańǵyǵa 2011 jyly keldi. Bir jyldan soń ol óziniń alǵashqy iri jarysy - Qazaqstan chempıonatyna bardy. Sol kezden-aq bilikti mamandardyń kózine túsken shákirtim Sochı olımpıadasyna daıyndaldy. Rasyn aıtý kerek, bastapqyda qajetti sport jabdyqtary bolmady. Sol sebepti oqý-jattyǵý jıyndaryna baryp júrdik», - dep eske alady Anatolıı Poıskovoı.

Shańǵy bapkeriniń sózinshe, Aleksandr Kolıadın eki-úsh jyldyń ishinde el quramasyna alyndy.

«2016 jyly Paralımpıadalyq komıtettiń tapsyrysymen Kolıadınge nemis fırmasynan jasandy aıaq satyp alyndy. Ol sodan bastap eliniń, týystarynyń, bapkerleriniń senimin aqtap keledi. Men onyń batyldyǵyna qaıran qalamyn. Eshqashan moıymady. Phenchhandaǵy jeńiske sol qasıetiniń arqasynda jetti», - deıdi bapkeri. 

Aıta ketý kerek, Aleksandr Paralımpıadaǵa attanar aldynda týystaryna altyn júlde ákelýge ýáde bergen.

«Bul jeńisti barlyǵy kútti. Tipti, Býrabaıdaǵy jattyǵýyna baryp kórdim. Fızıkalyq-moraldyq turǵydaǵy daıyndyǵyna shúbá keltirmedim. Onyń jeńgenin estigen kezde eńbegimniń aqtalǵynyna qýandym», - dedi A.Poıskovoı.

Búginde chempıondy Sarykól aýdanynda turatyn anasy men inisi asyǵa kútýde. Sóz joq, tórtjyldyq básekesindegi mundaı kórsetkish - bir ǵana otbasynyń emes, kúlli qazaq eliniń jeńisi.