Aleksandr Kasachev «Jetisý bórisi» atandy
TALDYQORǴAN.QazAqparat - Búgin Taldyqorǵanda «Jetisý bórisi» týrnıri ótti. Dúbirli dodada Aleksandr Kasachev bas júldeni jeńip aldy. Jeńimpazǵa sý jańa «Lada Granta» avtokóligi syıǵa tartyldy, dep habarlaıdy QazAqparat tilshisi.
Saıysqa 38 sańlaq qatysty. Olar osyǵan deıin Almaty oblysynyń aýdan-qalalaryndaǵy irikteý týrnırlerinde top jarǵan jáne ekinshi oryn ıelengen balýandar. Aqtyq synda jolyndaǵylardy japyra jeńgen, Taldyqorǵan atynan kilemge shyǵyp otyrǵan balýandar - Ulan Rysqul pen Aleksandr Kasachev kezdesti. Ulan - 1986 jyly týǵan, boıy 186 sm, salmaǵy 135 keli. Aleksandr - 1987 jyly týǵan, boıy 175 sm, salmaǵy 105 keli. Kezdesý tartysty bolǵanyna «Jastar» saraıyna jınalǵandar kýá. Áp degennen, esepti Aleksandr ashty. Búk upaıyn qanjyǵasyna baılap, jartylaı jeńiske de jetti. Ulan da qarap qalmady. 2 ret búk upaıyn ıelendi. Degenmen, ádis jasap, Ulandy jambasqa atyp jibergen Aleksandr Kasachev taza jeńdi. Osylaısha, Aleksandr Kasachev - «Jetisý bórisi» atandy. Ulan Rysqul ekinshi oryndy ıelendi.
Esterińizge sala keteıik, 31 naýryz kúni Taldyqorǵan qalasy ákiminiń júldesi úshin ótken «Taldyqorǵan bórisi» týrnırinde de osy eki balýan kósh bastaǵan edi. Al «Jetisý bórisi» týrnırinde úshinshi oryndy Qarasaı aýdanynyń balýany Asqar Túrequlov ıelendi. 1987 jyly týǵan sportshynyń boıy 175 sm, salmaǵy 108 keli.
Úshinshi orynǵa 300 myń teńge, 2 orynǵa 500 myń teńge, al bas júldege «Lada Granta» avtokóligi tapsyryldy. Endi Ulan Rysqul men bas júldeni jeńgen Aleksandr Kasachev «Qazaqstan barysy» týrnırinde Almaty oblysynyń namysyn qorǵaıdy.
