Aleksandr Gıntsbýrg: Koronavırýs ta tumaý sııaqty vaktsınamen retteletin aýrýǵa aınalady
MÁSKEÝ. QazAqparat – Reseıdiń N.F.Gamaleıa atyndaǵy epıdemıologııa jáne mıkrobıologııa ulttyq zertteý ortalyǵynyń dırektory Aleksandr Gıntsbýrg koronavırýs keleshekte tumaý sııaqty vaktsınamen retteletin aýrýǵa aınalady degen boljam aıtty. Bul týraly QazAqparat TASS agenttigine silteme jasap habarlaıdy.
«Adamzat bul ınfektsııany indet tiziminen yǵystyryp, qyzylsha, tumaý, qyzamyq sııaqty vaktsınamen retteletin aýrýlar sanatyna engizedi. Qoldanysqa engiziletin aqylǵa qonymdy sharalardyń arqasynda bul aýrý da tumaý sııaqty ótetin bolady. Biz bul indetten tıimdi qorǵanýdyń jolyn túbinde úırenemiz», - dedi ǵalym «Poka jıvy – býdem jıt» degen atpen shyǵatyn derekti fılmde.
Gıntsbýrgtyń aıtýyna qaraǵanda, koronavırýsqa qarsy vaktsınatsııa adamdy eki jyldan astam merzimge deıin ınfektsııadan qorǵaı alady.
«Evolıýtsııa protsesinde antıdenelerdiń ornyna jady bar jasýshalar paıda bolatyn mehanızm qalyptasty. Vaktsına almaı turyp sizdiń aǵzańyzda jady bar 100 jasýsha bolsa, vaktsınanyń ekinshi dozasyn alǵannan keıin onyń sany 10 myńǵa jetýi múmkin. Bir ret ekpe alýdyń arqasynda 3-5 aı boıy jady bar jasýshalardyń qorǵaýynda bolatynyńyzdy eskersek, ekinshi ret ekpe alý arqyly eki jyldan astam ýaqyt aǵzańyz jasýshalardyń qorǵaýynda bolady degen sóz», - dedi Aleksandr Gıntsbýrg.
