Aleksandr Dıýmanyń ataqty «Úsh Noıan» men «Graf Monte Krısto» kitaptarynyń qazaq tilindegi nusqalary jaryq kórdi

ALMATY. 1 naýryz. QazAqparat - QR Joǵary oqý oryndary qaýymdastyǵy qazaq oqyrmandarynyń álem ádebıetiniń klassıkalyq týyndylarymen sýsyndaýyna jaǵdaı jasaýda. Sonyń jarqyn kórinisi frantsýz jazýshysy Aleksandr Dıýmanyń Á.Jumabaevtyń tárjimasymen jaryq kórgen ataqty «Úsh Noıan» jáne Q.Jumaǵalıevpen birlesip aýdarǵan «Graf Monte Krısto» kitaptary bolyp otyr. Árqaısysy úsh myń danamen shyqqan bul shyǵarmalardyń qazaq tilinde jaryq kórýine qoldaý kórsetken QR Bilim jáne ǵylym mınıstrligi.

Qaýymdastyq oqýlyqtar men kórkem ádebı kitaptar óndirisin jandandyrý baǵytynda birqatar jobalardy júzege asyrýda. Sonyń biri - kórkem aýdarma. Bul baǵytta qazir jergilikti aýdarmashylar, búgingi oqyrmanǵa eń qyzyqty dep tanylǵan birqatar shetel jazýshylarynyń áıgili týyndylaryn tárjimalaýda. Máselen bıyl jyl sońyna deıin Stıg Larssonnyń «Aıdahar tańbaly qyz», Lı Chaıldtiń «Dushpan», «Ajal alańy», Den Braýnyń «Da Vınchı kody», Djeıms Hedlı Cheızdiń «Іz qalmasyn» atty kitaptarynyń qazaqsha nusqalaryn kitap etip basyp shyǵarmaq. Sondaı-aq, osy ýaqytqa deıin aýdarylǵan ózge de klassıkalyq týyndylardy da qajettilikke oraı qaıta basyp shyǵarý qolǵa alynýda.