Aleksandr Býblık Ýımbldon týrnıriniń úshinshi aınalymyna shyqty
A. Býblık ekinshi kezdesýin álemniń 64-raketkasy, serbııalyq Dýshan Laıovıchpen ótkizdi.
Osyǵan deıin qarsylastar bir-aq ret joldary toqaılasyp, onda serbııalyq sportshy basym túsken edi.
Bul joly qazaqstandyq tennısshi 7:6 (9:7), 6:2, 7:5 esebimen jeńiske jetti.
Eki saǵat 4 mınýtqa sozylǵan báseke barysynda Býblık 17 eıs jasap, 6 breık-poınttyń teń jartysyn múlt jibergen joq. Laıovıch 2 eıspen shektelip, bir ret te breık jasaı almady.
A.Býblık úshinshi aınalymda álemniń 23-raketkasy, amerıkalyq Frensıs Tıafomen sheberlik baıqasady.
Qazaqstandyq sportshy jýyrda Istbýrn jarysynda F.Tıafony 5:7, 7:6 (7:4), 6:0 esebimen utqan bolatyn.
Ótken jyly Aleksandr Ýımbldonda úshinshi aınalymǵa deıin jetken edi. Qazirdiń ózinde sol úzdik nátıjesin qaıtalap otyr.
Eske sala keteıik, budan buryn Elena Rybakınanyń ekinshi aınalymǵa ótkenin jazǵan bolatynbyz.
Sondaı-aq Elena Rybakına álemde eıs jasaýdan kósh bastap keledi.
