Aleksandr Býblık Shtýtgarttaǵy týrnırde germanııalyq tennısshiden ese qaıyrdy
ASTANA. KAZINFORM — Qazaqstannyń birinshi, álemniń 11-raketkasy Aleksandr Býblık Shtýtgart (Germanııa) ATP 250 týrnıriniń shırek fınalyna joldama aldy.
Shtýtgartta úshinshi raketka bolyp tirkelgen qazaqstandyq tennısshi jarysty ekinshi aınalymnan bastady.
A.Býblık álemniń 77-raketkasy, germanııalyq ıAn-Lennard Shtrýfqa tap keldi. Býblık úshin Shtrýff qolaısyz qarsylastardyń biri deýge bolady. Osyǵan deıin ózara segiz ret kezdesip, sonyń beseýinde germanııalyq sportshy jeńgen.
Munyń aldynda Rolan Garros týrnıriniń alǵashqy aınalymynda Býblık Shtrýftan kútpegen jerden utylyp, qapy qalǵan edi.
Bul joly birinshi partııada taı-breıkte Aleksandrdyń asyǵy alshysynan tústi – 7:6 (7:3). Ekinshisinde jergilikti tennısshi qarymta qaıyrdy – 6:3.
Degenmen úshinshi, sheshýshi sette Býblık 3:0 esebimen alǵa ketti. Aqyry matchty taǵy bir breıkpen túıindedi – 6:2.
Bir saǵat 43 mınýtqa sozylǵan tartysty básekede A.Býblık 22 eıspen birge 7 breık-poınttyń ekeýin paıdaǵa asyrdy. Shtrýff 17 eıs, 1 breıkpen (3 breık-poınt) shekteldi.
Aleksandr Býblık jartylaı fınalǵa shyǵý úshin reıtıngide 93-oryndaǵy frantsııalyq Djovannı Mpetchı Perrıkarmen talasady.
Shtýtgart dodasynyń júlde qory 768 220 eýroǵa baǵalanǵan. Jeńimpaz 116 855 eýro tabys taýyp, 250 reıtıngilik upaıǵa qol jetkizedi.
Eske sala keteıik, budan buryn Aleksandr Shevchenkonyń Slovakııadaǵy týrnırdi sátti bastaǵanyn jazǵan edik.
Sondaı-aq Anna Danılına London týrnıriniń shırek fınalyna shyqty.
