Aleksandr Býblık Rotterdamda jarys jolynan shyǵyp qaldy

ASTANA. KAZINFORM – Aleksandr Býblık juptyq synda ıtalııalyq Lorentso Mýzettımen birge Rotterdam (Nıderland) ATP 500 týrnıriniń jartylaı fınalynan tys qaldy.

A.Býblık – L.Mýzettı shırek fınalda nıderlandylyqtar Robın Hase – Botık Van de Zandshýlppen betpe-bet keldi.

Birinshi partııada esep 3:3 bolǵan mezette nıderlandylyq dýet breık jasap ketti – 6:4. Ekinshi sette olar 5:1 esebimen alǵa shyqty. Aqyry basymdylyqty ýysynan shyǵarǵan joq – 6:2.

Bir saǵattan astam ýaqytqa sozylǵan báseke barysynda qazaqstandyq-ıtalııalyq jup 2 eıs jasaǵanymen, 6 breık-poıntty múlt jiberdi. Nıderlandylyqtar 1 eıs, 3 breıkpen (6 breık-poınt) kózge tústi.

Osylaısha, halyqaralyq jarystarda kortqa shyqqan qazaqstandyq tennısshilerden búgin A.Býblık qana jeńilip qaldy.

Eske sala keteıik, budan buryn Aleksandr Shevchenkonyń Rotterdamda sensatsııa jasap, álemniń 7-raketkasyn utqanyn jazǵan bolatynbyz.

Elena Rybakına Dohada AQSh chempıonatynyń fınalısin jeńip, jartylaı fınalǵa shyqty.