Aleksandr Býblık Rotterdamda 12 eıs jasap, ekinshi aınalymǵa ótti
ASTANA. KAZINFORM – Qazaqstannyń birinshi, álemniń 23-raketkasy Aleksandr Býblık Rotterdam (Nıderland) ATP 500 týrnırin jeńispen bastady.
Іri jarystyń 8-raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngide 31-orynda turǵan horvatııalyq Borna Chorıchpen betpe-bet keldi.
Jýyrda, 4 aqpan kúni Monpele (Frantsııa) ATP 250 dodasynyń fınalynda A.Býblık B.Chorıchti 5:7, 6:3, 6:2 esebimen utyp, chempıon atanǵan edi.
Bul joly birinshi partııada esep 3:2 bolǵan mezette qazaqstandyq sportshy breık jasaı bildi – 6:3.
Ekinshi sette esep 2:2 bolǵanda, Býblık qaıtadan breık jasap, alǵa ketti – 4:2. Aqyry sol basymdylyǵynan aıyrylmady – 6:4.
Bir saǵat 51 mınýtqa sozylǵan tartysty báseke barysynda A.Býblık 12 eıs jasap, 8 breık-poınttyń ekeýin múlt jibermedi. B.Chorıch 3 eıs jasaǵanymen, 5 breık-poıntyn paıdalana alǵan joq.
Aleksandr Býblık shırek fınalǵa shyǵý úshin álemdik reıtıngide kezinde úshinshi orynǵa deıin kóterilgen, qazir 309-satydaǵy, 2016 jylǵy Ýımbldonnyń fınalısi, 33 jastaǵy kanadalyq Mılosh Raonıchpen talasady. Ol bastapqy kezdesýinde álemniń 141-raketkasy, nıderlandylyq Iesper De Iongty tize búktirdi – 7:6 (7:5), 6:4.
Júlde qory 2,1 mln AQSh dollarynan asatyn Rotterdam týrnıri 18 aqpanda aıaqtalady.
Eske sala keteıik, budan buryn Anna Danılınanyń Dohada jarys jolynan shyǵyp qalǵanyn jazǵan bolatynbyz.
