Aleksandr Býblık Parıj masters jarysyn jeńispen bastady

ASTANA. KAZINFORM — Qazaqstannyń birinshi, álemniń 16-raketkasy Aleksandr Býblık Parıj (Frantsııa) masters týrnıriniń ekinshi aınalymyna shyqty.

Jarystyń 13-raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngide 47-orynda turǵan aýstralııalyq Alekseı Popyrınmen kezdesti.

Birinshi partııany Býblık breıkpen aıaqtaı aldy — 6:4. Ol ekinshi sette de esesin jibergen joq — 6:3.

Bir saǵat 14 mınýtqa sozylǵan matchta A.Býblık 13 eıspen birge 5 breık-poınttyń úsheýin paıdalandy. Popyrın 3 eıs, 1 breıkten (4 breık-poınt) asa almady. 

Aleksandr Býblık úshinshi aınalymǵa shyǵý úshin álemniń 32-raketkasy, frantsııalyq Korenten Mýte nemese reıtıngide 52-satydaǵy amerıkalyq Raıllı Opelkanyń qaı jeńgenimen sheberlik talastyrady.

Parıj masters dodasynyń júlde qory bıyl 6 mln 128,940 myń eýroǵa baǵalanǵan. 2 qarashada máresine jetetin jarystyń jekeleı syndaǵy jeńimpazy 946,610 myń eýro tabys tabady.

Ótken jyly munda fınalda frantsııalyq Ýgo Ýmberdi utqan germanııalyq Aleksandr Zverev chempıon atandy. Al A.Býblık ekinshi aınalymnan asa almaǵan edi.

Dúısenbi kúni jańartylǵan ATP reıtıngisinde 16-ornyn saqtap qalǵan qazaqstandyq tennısshi Parıjde sátti óner kórsetse, odan da joǵary satyǵa kóterile alady.

Eske sala keteıik, budan buryn Pýtıntsevanyń Qytaıdaǵy týrnırde qarsylasyn oısyrata jeńgenin jazǵan edik.