Aleksandr Býblık Parıj masters týrnıriniń shırek fınalyna shyǵa almady

Qazaqstannyń birinshi, álemniń 33-raketkasy Aleksandr Býblık Parıj masters týrnıriniń shırek fınalyna shyǵa almady, dep habarlaıdy Kazinform.

Qazaqstandyq tennısshi úshinshi aınalymda álemniń 17-raketkasy, bolgarııalyq Grıgor Dımıtrovpen sheberlik baıqasty. 

Munyń aldynda álemniń 3-raketkasy, reseılik Danııl Medvedevti joldan taıdyrǵan bolgarııalyq sportshy bul joly da basymdylyq tanytty. Qorytyndy esep – 6:2, 6:2. 

Bir saǵattan astam ýaqytqa sozylǵan báseke barysynda Býblık 5 eıs jasap, 3 breık-poınttyń bireýin ǵana paıdalandy. Dımıtrov 2 eıs, 5 breıkpen (9 breık-poınt) kózge tústi. 

Endi Grıgor jartylaı fınalǵa shyǵý úshin argentınalyq Fransısko Serýndolo nemese Polsha ókili Hýbert Hýrkachtyń bireýimen talasady. Al Frantsııa astanasyndaǵy masters jarysy 5 qarashada aıaqtalady. 

Eske sala keteıik, budan buryn tennısten álem chempıonatynda Qazaqstan jasóspirimder quramasynyń shırek fınalǵa bir qadam jetpeı toqtaǵanyn jazǵan bolatynbyz.