Aleksandr Býblık Parıj masters týrnıriniń fınalynan tys qaldy

ASTANA. KAZINFORM — Qazaqstandyq tennısshi jartylaı fınalda álemniń 10-raketkasy, kanadalyq Felıks Oje-Alıassımmen betpe-bet keldi. 

Bul kezdesýdiń qos sportshy úshin de mańyzy zor edi. Óıtkeni Italııanyń Týrın qalasynda ótetin jyldyń qorytyndy týrnırine qatysý úshin sońǵy, segizinshi joldamadan ekeýi de úmitti bolatyn.

Bıyl Dýbaıdaǵy dodada kanadalyq tennısshi A.Býblıkti 2 saǵat 51 mınýtqa sozylǵan tartysty básekede 7:6 (9:7), 6:7 (4:7), 6:3 esebimen jeńgen edi. Bul joly birinshi partııada taı-breıkte Oje-Alıassım múlt ketken joq – 7:6 (7:3).

Ekinshi sette Býblık breık jasap, 2:0 esebimen alǵa shyqqanymen, izinshe óz geımin berip qoıdy. Sosyn ashýǵa boı aldyryp, raketkasyn kortqa uryp syndyrdy. Budan keıin qazaqstandyq tennısshi taǵy bir breıkpen esepti 4:1-ge jetkizgenimen, qarsylasy tarazy basyn teńestirdi – 4:4. Aqyry jeńis kanadalyqtyń enshisinde ketti – 6:4.

Bir saǵat 37 mınýtqa sozylǵan básekede Býblık 5 eıspen birge 2 breık-poıntty óz esebine jazdy. Oje-Alıassım 12 eıs jasap, 4 breık-poınttyń úsheýin paıdalandy. Osylaısha, Býblıktiń Parıj masters týrnırindegi tórt matchqa sozylǵan jeńisti serııasy úzildi. Ol buǵan deıin álemdik reıtıngide úzdik ondyqqa kiretin amerıkalyq Teılor Frıts pen aýstralııalyq Aleks de Mınordy jeńgen.

Atalmysh týrnırde alǵash ret jartylaı fınalǵa deıin jetken Býblık 282 650 eýro tabys taýyp, 400 reıtıngilik upaıǵa ıe boldy. Qazirgi kezde ol ATP Live reıtıngisinde 13-inshi, al chempıondyq kestede 11-orynǵa kóterilip tur. 

Chempıondyq kestede 8-satyǵa shyqqan Felıks Oje-Alıassım fınalda álemniń 2-raketkasy, ıtalııalyq ıAnnık Sınnermen chempıondyq ataqqa talasady. Ol jartylaı fınalda reıtıngide 3-oryndaǵy germanııalyq Aleksandr Zverevti 6:0, 6:1 esebimen oısyrata jeńdi.

Ótken jyly Parıjde A.Zverev úzdik shyqqan bolatyn.

Eske sala keteıik, budan buryn Aleksandr Býblıktiń tuńǵysh ret masters týrnıriniń jartylaı fınalyna shyqqanyn jazǵan bolatynbyz.