Aleksandr Býblık Paris Masters týrnırinde jeńilip qaldy

ASTANA. QazAqparat – Qazaqstannyń birinshi, álemniń 36-raketkasy Aleksandr Býblık Parıj ATP 1000 týrnıriniń ekinshi aınalymyna shyǵa almady, dep habarlaıdy QazAqparat tilshisi.

Qazaqstandyq sportshy alǵashqy aınalymda dúnıejúzilik reıtıngide 74-orynda turǵan shvetsııalyq Mıkael Imermen kezdesti.

A.Býblık matchty breıkpen bastaǵanymen, odan keıin qatarynan alty geımdi qarsylasyna berip qoıdy – 1:6.

Tartysty órbigen ekinshi sette qazaqstandyq tennısshi taı-breıkte kózdegenin túsirip, shıraqtyq tanytty – 7:6 (7:2).

Úshinshi, sheshýshi partııada esep 4:5 bolǵan mezette A.Býblık dop bergende qatelikke boı aldyrdy.

Eki saǵat 10 mınýtqa sozylǵan báseke barysynda A.Býblık 16 eıs jasap, 8 breık-poınttyń bireýin ǵana paıdalandy. Qarsylasy 1 eıs, 4 breıkpen (11 breık-poınt) kózge tústi.

M.Imer ekinshi aınalymda álemniń 8-raketkasy, kanadalyq Felıks Oje-Alıassımmen sheberlik baıqasady.

Ótken jyly osy masters jarysynda A.Býblık ekinshi aınalymnan asa almaǵan edi.

Eske sala keteıik, budan buryn qazaqstandyq tennısshi qatysatyn WTA qorytyndy týrnıriniń jerebesi tartylǵanyn jazǵan bolatynbyz.

Sondaı-aq Aleksandr Býblıktiń Parıj masters týrnırindegi qarsylasy anyqtalǵanyn habarlaǵan edik.