Aleksandr Býblık Mıýnhen týrnırine joldama aldy

ASTANA. KAZINFORM — Qazaqstannyń birinshi, álemniń 76-raketkasy Mıýnhen (Germanııa) ATP 500 týrnıriniń irikteý saıysyn sátti aıaqtady.

Qazaqstandyq tennısshi irikteý saıystarynyń fınalynda dúnıejúzilik reıtıngide 546-orynda turǵan germanııalyq, 17 jastaǵy Dıego Dedýra-Palomeromen sheberlik baıqasty. Eki set te 6:3 esebimen Býblıktiń paıdasyna sheshildi.

Bir saǵattan astam ýaqytqa sozylǵan básekede A.Býblık 2 eıspen birge 10 breık-poınttyń beseýin óz esebine jazdy. Germanııalyq sportshy 2 breıkpen shekteldi. Osylaısha, Aleksandr Býblık 14-20 sáýir aralyǵynda ótetin negizgi jarysqa joldama aldy.

Taǵy bir qazaqstandyq Aleksandr Shevchenko irikteý saıystarynyń fınalynda horvatııalyq Bora Goıodan jeńilip qaldy 4:6, 4:6.

Eske sala keteıik, budan buryn tennısten álem chempıonatynda Qazaqstan jasóspirimder quramasynyń irikteý týrnıriniń fınalyna shyqqanyn jazǵan bolatynbyz.