Aleksandr Býblık Monte-Karlo masters týrnıriniń úshinshi aınalymyna shyǵa almady
NUR-SULTAN. QazAqparat – Qazaqstannyń birinshi, álemniń 36-raketkasy Aleksandr Býblık Monte-Karlo ATP Masters 1000 týrnıriniń úshinshi aınalymyna shyǵa almady, dep habarlaıdy QazAqparat tilshisi.
Qazaqstandyq tennısshi ekinshi aınalymda álemniń 19-ynshy, osy jarystyń 13-raketkasy, ıspanııalyq Pablo Karreno-Býstamen sheberlik baıqasty.
Birinshi partııada breık jasaǵan A.Býblık sol qarqynynan aıyrylǵan joq – 6:4.
Aleksandr ekinshi setti de breıkpen bastady – 2:0. Áıtse de esep 5:4 bolyp, matchqa dop bergende, qarsylasy breık jasap ketti. Taı-breıkte ıspanııalyqtyń joly boldy – 7:6 (7:3).
Úshinshi, sheshýshi partııada esep 3:4 bolǵan mezette A.Býblık matchty jalǵastyrýdan bas tartty.
Bir saǵat 41 mınýtqa sozylǵan básekede qazaqstandyq sportshy 11 eıs jasap úlgerip, 4 breık-poınttyń ekeýin paıdalandy. Qarsylasy 2 eıs, 2 breıkpen kózge tústi.
P.Karreno-Býsta júlde qory 5,8 mln eýroǵa baǵalanǵan dodanyń shırek fınalyna shyǵý úshin álemniń 3-raketkasy, germanııalyq Aleksandr Zverev nemese reıtıngte 34-oryndaǵy argentınalyq Federıko Delbonıstiń bireýimen talasady.
Eske sala keteıik, budan buryn qazaqstandyq jas tennısshilerdiń álem chempıonaty irikteý kezeńiniń shırek fınalyna shyqqanyn, Germanııa quramasynyń kapıtany Rybakına men Kerberdiń oıyny qyzyqty bolatynyn aıtqanyn jazǵan bolatynbyz.
Sondaı-aq Qazaqstan jasóspirimder quramasy Ońtústik Koreıamen oınaıdy.
Germanııanyń birinshi raketkasy Qazaqstanmen matchtyń qıynǵa túsetinin aıtty.
