Aleksandr Býblık: Leıver kýbogyna qatysý – men úshin qyzyqty tájirıbe

Bul 29 jastaǵy qazaqstandyq sportshy úshin osyndaı dárejedegi alǵashqy synaq bolmaq. Londonda ol maýsym boıy ózine ádette qarsylas bolyp kelgen oıynshylarmen birge Álem komandasynyń namysyn qorǵaıdy. 

- Men úshin mundaı komandada bolý – qyzyqty tájirıbe. Buǵan deıin men tek Devıs kýbogy aıasyndaǵy komandalyq jarystarǵa qatystym. Árıne, Leıver kýbogy – múlde basqa shara, degenmen munda naǵyz komandalyq rýh seziledi, - deıdi A.Býblık.

Leıver kýbogy jeke oıynshylar birlesip óner kórsetetin jarys retinde oılastyrylǵan.

Týrnır Rodjer Federerdiń ıdeıasy boıynsha alǵash ret 2017 jyly ótkizilgen. Onda Eýropanyń alty úzdik oıynshysy qalǵan qurlyqtyń alty ókilimen kezdesedi. Onda úsh kún boıy kortqa shyǵyp qana qoımaı, únemi bir komandanyń ishinde bolady. 

Leıver kýbogynyń ereksheligi, munda ár urpaq ókilderi – jastarmen qatar tájirıbeli sportshylar bir komandada bolyp, jalpy nátıje úshin birge kúresedi.

Týrnır barysynda komanda ár utqan match úshin birinshi kúni 1, ekinshi kúni 2, qorytyndy úshinshi kúni 3 upaı alady. Birinshi bolyp 13 upaı jınaǵan komanda jeńimpaz atanady. 

Reıtıngilik upaıdyń joqtyǵyna qaramastan, nátıje mańyzdy ról atqarady. 

- Reıtıngilik upaı bolmasa da, komandanyń jeńiske umtylýy meni tańǵaldyrdy. Munda kelgende, kortqa jeńý úshin shyǵý qajettigin túsindim. Biz taktıkany, matchqa qatysty nárseniń bárin únemi talqylaımyz. Sondyqtan bul – men úshin qyzyqty tájirıbe, - dedi qazaqstandyq sportshy. 

Leıver kýbogy oınatylǵannan beri Eýropa men Álem komandasynyń taıtalasy tartysty bolyp keledi. Alǵashqy tórt oıynda eýropalyq komanda jeńiske jetse, sodan keıin qarsylastary kúsh alady. Bıylǵy týrnır aldynda esep – 5:3, Eýropanyń paıdasynda. 

Býblık Leıver kýbogyna shaqyrylatyn qatysýshynyń mártebesine nazar aýdardy. Bul – álemdegi myqty oıynshylardyń shekteýli quramyna ený degen sóz. 

- Eýropa nemese Álem komandasyna shaqyrtý alý – bul artyqshylyq, bálkim, seniń jemisti jyldy ótkizgenińniń moıyndalýy. Munda sen myqty oıynshylarmen birge jalpy nátıje úshin kúresýge múmkindik alasyń, - deıdi álemniń 21-raketkasy.

Komanda quramy tek reıtıng negizinde ǵana anyqtalmaıdy, birqatar oıynshyny kapıtandar tańdaıdy. Bıylǵy Álem komandasynyń kapıtany, «Úlken dýlyǵa» týrnıriniń segiz márte chempıony, 56 jastaǵy Andre Agassı, onyń kómekshisi – AQSh ashyq chempıonatynyń eki dúrkin jeńimpazy, 53-tegi Patrık Rafter.

Basqa jarystarda sportshylar ádette tek óz matchtaryna ǵana kóńil bólse, munda komanda birneshe kún boıy birge bolady. Jattyǵýmen qatar birge tamaqtaný, bolashaq matchtardy birge talqylaý otbasylyq atmosferany týǵyzady. 

- Men Andremen de, Petpen de kóp áńgimelestim. Shynynda da bir otbasy sekildimiz. Biz tańǵy, túski jáne keshki asty birge ishemiz, jattyǵamyz, aldaǵy oıynda jeńiske jetý jolyn talqyǵa salamyz. Sondyqtan bul týrnırdiń bolashaǵy uzaq dep oılaımyn, - deıdi Býblık.

A.Býblık Leıver kýbogyna qatysý aıryqsha komandalyq tájirıbe almasý túri bolsa da, ony ulttyq qurama sapynda óner kórsetýmen salystyrmaý kerektigin atap ótti. 

- Qazaqstan namysyn qorǵaý – aıryqsha qurmet. Men bul elge qonaq retinde keldim, ýaqyt óte kele, halyqpen baılanysym nyǵaıdy. Men úshin Qazaqstan úshin oınaý – árqashan erekshe sezim, sondyqtan oǵan árdaıym razy kóńilmen oralamyn, - dedi ol.

Býblık Qazaqstan tennıs federatsııasymen Devıs kýbogynyń bolashaq bir matchyn Almaty qalasynda ótkizý múmkindigi talqylanǵanyn jetkizdi. Óziniń aıtýynsha, ońtústik astanada oınamaǵanyna kóp ýaqyt bolǵan. 

Leıver kýbogynyń toǵyzynshy týrnıri Londonda 25-27 qyrkúıek aralyǵynda ótedi. Budan burynǵy segiz dodaǵa álemniń 26 elinen 62 tennısshi qatysqan. 

Eske sala keteıik, budan buryn Bıllı Djın Kıng kýbogynda Qazaqstan quramasy jartylaı fınaldan tys qalǵanyn jazǵan edik.