Aleksandr Býblık Kanadadaǵy masters týrnırinde utylyp qaldy

ASTANA. QazAqparat – Qazaqstannyń birinshi, álemniń 28-raketkasy Aleksandr Býblık Toronto (Kanada) masters týrnıriniń ekinshi aınalymyna shyǵa almady, dep habarlaıdy QazAqparat tilshisi.

Qazaqstandyq tennısshi alǵashqy aınalymda álemniń 17-raketkasy, Polsha ókili Hýbert Gýrkachpen kezdesti.

Polıak tennısshisi 6:3, 7:6 (7:2) esebimen jeńiske jetti.

Bir saǵattan astam ýaqytqa sozylǵan báseke barysynda Býblık 10 eıs jasap, 3 breık-poınttyń ekeýin paıdalandy. Qarsylasy 7 eıs, 4 breıkpen (7 breık-poınt) kózge tústi.

A. Býblık júlde qory 6,6 mln AQSh dollaryna baǵalanǵan jarystyń juptyq synynda da óner kórsetedi. Ol frantsııalyq Adrıan Mannarınomen birge alǵashqy aınalymda frantsııalyq Fabrıs Marten – germanııalyq Andreas Mespen sheberlik baıqasady.

Qazaqstannyń áıelder arasynda juptyq syndaǵy birinshi, álemniń 25-raketkasy Anna Danılınanyń Monreal masters dodasyndaǵy qadamy sátsiz boldy. Ol amerıkalyq Betanı Mattek-Sandspen birge chehııalyqtar Karolına Mýhova – Marketa Vondroýshovaǵa jol berdi – 6:0, 4:6, 4:10.

Eske sala keteıik, budan buryn Elena Rybakınanyń álemdik reıtıngte úzdik úshtikten tys qalǵanyn jazǵan bolatynbyz.