Aleksandr Býblık Indıan-Ýells masters jarysynyń kelesi aınalymyna ótti

ASTANA. KAZINFORM — Qazaqstannyń birinshi, álemniń 20-raketkasy Aleksandr Býblık Indıan-Ýells masters týrnıriniń úshinshi aınalymyna ótti.

Jarysty ekinshi aınalymnan bastaǵan qazaqstandyq tennısshi dúnıejúzilik reıtıngide 139-orynda turǵan qytaılyq Tszıýnchen Shanmen synǵa tústi.

Tartysty órbigen birinshi partııany A.Býblık breıkpen támamdady – 6:4.

Qazaqstandyq sportshy ekinshi sette qarqynyn údetip, esepti 4:0-ge jetkizdi. Aqyry matchty jeńispen aıaqtaý qıynǵa túsken joq – 6:1.

Bir saǵattan astam ýaqytqa sozylǵan báseke barysynda Býblık 10 eıs jasap, 5 breık-poınttyń tórteýin múlt jibergen joq. Shan 1 breıkpen (4 breık-poınt) shekteldi.

A.Býblıktiń úshinshi aınalymdaǵy qarsylasy áldeqaıda myqty. Qazaqstandyq tennısshi álemniń 10-raketkasy, aýstralııalyq Aleks de Mınormen kortqa shyǵady.

Qazirgi sátte Aleksandr Býblık ATP Live reıtıngisinde 18-orynǵa kóterilip tur.

Eske sala keteıik, budan buryn qatarynan 22 matchta jeńiske jetken Dmıtrıı Popkonyń Brazılııada jartylaı fınalǵa ótkenin jazǵan bolatynbyz.