Aleksandr Býblık Frantsııadaǵy týrnırdi jeńispen bastady
ASTANA. QazAqparat - Qazaqstannyń birinshi, álemniń 44-raketkasy Aleksandr Býblık Metts (Frantsııa) ATP 250 týrnırin jeńispen bastady, dep habarlaıdy QazAqparat tilshisi.
Qazaqstandyq tennısshi bastapqy kezdesýin dúnıejúzilik reıtıngte 208-orynda turǵan, negizgi jarysqa irikteý saıystarynan keıin qosylǵan frantsııalyq Evan Fernespen ótkizdi.
Birinshi partııada frantsııalyq sportshy 7:5 esebimen basym tústi.
Ekinshisinde A.Býblık ese qaıyrdy - 6:4.
Úshinshi, sheshýshi sette qazaqstandyq tennısshi taı-breıkte jeńisti julyp aldy - 7:6 (7:5).
Eki saǵat jarymnan astam ýaqytqa sozylǵan matchta A.Býblık 14 eıs jasap, 10 breık-poınttyń teń jartysyn paıdalana bildi.
Aleksandr Býblık ekinshi aınalymda álemniń 51-raketkasy, fınlıandııalyq Emıl Rýýsývýorımen sheberlik baıqasady.
A.Býblık juptyq synda da sátti óner kórsetýde. Ol ıtalııalyq Lorentso Mýzettımen birge nıderlandylyq Robın Hase - aýstrııalyq Fılıpp Osvaldty 7:6 (8:6), 6:3 esebimen utyp, shırek fınalǵa shyqty.
Qazaqstandyq-ıtalııalyq jartylaı fınalǵa shyǵý dodanyń 3-raketkalary, frantsııalyqtar Nıkolıa Maıý - Edýar Roje-Vasslenmen talasady.
Eske sala keteıik, budan buryn Elena Rybakınanyń Tokıo týrnırinde jeńilip qalǵanyn jazǵan bolatynbyz.
Sondaı-aq «Astana Open» týrnırinde «Úlken dýlyǵa» jarysynyń bes chempıony óner kórsetedi.
Foto: ktf.kz
