Aleksandr Býblık ekinshi ret qatarynan topyraq tósenishindegi týrnırdiń fınalyna shyqty

ASTANA. KAZINFORM — Qazaqstannyń birinshi, álemniń 30-raketkasy Aleksandr Býblık Kıtsbıýel (Aýstrııa) ATP 250 týrnıriniń fınalyna joldama aldy.

Jarystyń 1-raketkasy bolyp tirkelgen qazaqstandyq tennısshi jartylaı fınalda reıtıngide 103-orynda turǵan nıderlandylyq Botık van de Zandshýlppen sheberlik baıqasty.
Birinshi partııada esep 3:2 bolǵan mezette Býblık breık jasap, sosyn óz múmkindigin jibermedi – 6:3.

Esesine ekinshi sette Zandshýlp 3:0 esebimen alǵa shyqty. Degenmen Býblık qaıyra eki breık jasap, aqyry matchty jeńispen túıindedi – 6:4.

Bir saǵat 19 mınýtqa sozylǵan báseke barysynda A.Býblık 9 eıspen birge 9 breık-poınttyń úsheýin óz esebine jazdy. Zandshýlp 2 eıs, 1 breıkpen (2 breık-poınt) shekteldi.
Osylaısha, qazaqstandyq tennısshi qatarynan ekinshi ret topyraq tósenishindegi týrnırdiń fınalyna ótti. Budan bir apta buryn ol Gshtaad (Shveıtsarııa) ATP 250 jarysynda jeńimpaz atanǵan edi.

Aleksandr Býblık fınalda reıtıngide 100-satydaǵy frantsııalyq Artýr Kazomen chempıondyq ataqty sarapqa salady. A.Kazo jartylaı fınalda álemniń 65-raketkasy, otandasy Artýr Rınderkneshten basym tústi – 7:5, 6:3.

A.Býblık Gshtaad dodasynyń jartylaı fınalynda A.Kazony joldan taıdyrǵan edi – 6:1, 7:5.
Aýstrııada óner kórsetip jatqan qazaqstandyq tennısshi 26 shilde – 7 tamyz aralyǵynda ótetin Toronto (Kanada) masters týrnırine qatysýdan bas tartty. Ony ıspanııalyq Pablo Karreno-Býsta almastyrady.

Eske sala keteıik, budan buryn 17 jastaǵy Ámir Omarhanovtyń alǵash ret Qazaqstan chempıonatynyń fınalyna ótkenin jazǵan edik.

Sondaı-aq Zarına Dııas Portýgalııadaǵy jarystyń jartylaı fınalyna ótti.