Aleksandr Býblık Dýbaı ATP 500 týrnıriniń ekinshi aınalymyna ótti

ASTANA. KAZINFORM — Qazaqstannyń birinshi, álemniń 23-raketkasy Aleksandr Býblık Dýbaı ATP 500 týrnırin sátti bastady.

Jarystyń 7-raketkasy bolyp tirkelgen qazaqstandyq sportshy bastapqy kezdesýin dúnıejúzilik reıtıngide 65-orynda turǵan, dodany irikteý saıysynan bastaǵan chehııalyq Tomash Mahachpen ótkizdi.

Chehııa ókili matchty qarqyndy bastady — 6:2.

Esesine ekinshi sette Býblık ese qaıyrdy — 6:3.

Úshinshi, sheshýshi partııada esep 6:5 bolyp, matchqa dop bergende, A.Býblık sol múmkindigin múlt jiberdi. Degenmen taı-breıkte jeńisti julyp aldy — 7:6 (7:5).

Eki saǵatqa jýyq ýaqytqa sozylǵan tartysty báseke barysynda Býblık 7 eıspen birge 6 breık-poınttyń teń jartysyn paıdalandy. Qarsylasy 3 eıs, 4 breıkpen (8 breık-poınt) kózge tústi.

Aleksandr Býblık júlde qory 2,9 mln AQSh dollaryna baǵalanǵan týrnırdiń shırek fınalyna shyǵý úshin álemniń 28-raketkasy, nıderlandtyq Tallon Grıkspor nemese reıtıngide 228-satydaǵy ıordanııalyq Abedalla Shelbaıhtyń bireýimen talasady.

Taǵy bir qazaqstandyq, reıtıngide 47-satydaǵy Aleksandr Shevchenko erteń alǵashqy aınalymda álemniń tórtinshi, jarystyń 1-raketkasy, reseılik Danııl Medvedevpen oınaıdy. 

Ótken jyly A.Býblık Dýbaıda ekinshi aınalymda dál osy D. Medvedevke ese jibergen edi.

Eske sala keteıik, budan buryn Ámir Omarhanovtyń jasóspirimder arasynda álemdik reıtıngide 12-orynǵa kóterilgenin jazǵan bolatynbyz.

Sondaı-aq Mıhaıl Kýkýshkın Ispanııada negizgi týrnırge joldama aldy.