Aleksandr Býblık Belgııadaǵy jarystyń fınalyna shyqty

Qazaqstannyń birinshi, álemniń 36-raketkasy Aleksandr Býblık Antverpen (Belgııa) ATP 250 týrnıriniń fınalyna shyqty, dep habarlaıdy Kazinform.

Jarystyń 3-raketkasy bolyp tirkelgen A.Býblık jartylaı fınalda dúnıejúzilik reıtıngte 127-orynda turǵan germanııalyq Maksımılıan Marterermen sheberlik baıqasty.

Birinshi partııada qazaqstandyq tennısshi birdeı breık jasap, 2:0 esebimen alǵa ketti. Sol basymdylyqty saqtap qala aldy – 6:4.

Ekinshi sette esep 3:3 bolǵan mezette Býblık taǵy bir breıkke qol jetkizdi. Aqyry matchty jeńispen túıindedi – 6:4.

Bir saǵat 25 mınýtqa sozylǵan báseke barysynda A.Býblık 12 eıs jasap, 5 breık-poınttyń ekeýin óz esebine jazdy. M.Marterer 1 eıske qol jetkizip, 5 breık-poınttyń bireýin de paıdalana alǵan joq.

Aleksandr Býblık fınalda álemniń 7-raketkasy, grekııalyq Stefanos Tsıtsıpas nemese reıtıngte 38-satydaǵy frantsııalyq Artıýr Fıstiń bireýimen bas júldeni sarapqa salady.

Eske sala keteıik, budan buryn Aleksandr Býblıktiń Belgııadaǵy jarystyń jartylaı fınalyna ótkenin jazǵan bolatynbyz.

Sondaı-aq Andreı Golýbev Shvetsııadaǵy týrnırdiń fınalyna joldama aldy.