Aleksandr Býblık Aýstralııa ashyq chempıonatyn jeńispen bastady

ASTANA. KAZINFORM – Qazaqstannyń birinshi, álemniń 10-raketkasy Aleksandr Býblık Aýstralııa ashyq chempıonatynyń ekinshi aınalymyna shyqty.

Qazaqstandyq tennısshi bastapqy kezdesýin álemniń 48-raketkasy, amerıkalyq Djenson Brýksbımen ótkizdi.

Jyldy Gonkong týrnırindegi chempıondyq ataqpen bastaǵan A.Býblık bul joly birinshi partııada 2:0 esebimen alǵa ketip, sol basymdylyǵyn saqtap qaldy – 6:4. Ekinshi set te osyndaı baǵytta órbidi – 6:4. Úshinshi, partııada Býblık taǵy da 2:0 esebimen alǵa shyqqanymen, Brýksbı tarazy basyn teńestire aldy – 2:2. Degenmen esep 4:4 bolǵan mezette Býblık taǵy bir breıkke qol jetkizdi. Sosyn matchqa dop bergende, qatelesken joq – 6:4. Eki saǵat 4 mınýtqa sozylǵan básekede A.Býblık 12 eıspen birge 11 breık-poınttyń tórteýin óz esebine jazdy. Brýksbı 4 eıs, 1 breıkpen (8 breık-poınt) shekteldi.

Aleksandr Býblık úshinshi aınalymǵa shyǵý úshin álemniń 55-raketkasy, majarstandyq Marton Fýchovıchpen talasady. Ol alǵashqy aınalymda álemniń 47-raketkasy, argentınalyq Kamılo Ýgo Karabelıdi joldan taıdyrdy – 7:6 (7:5), 6:1, 6:2. 

Býblık úshinshi aınalymǵa ótse, álemniń 22-raketkasy, ıtalııalyq Flavıo Kobollımen kezdesýi múmkin edi. Alaıda F.Kobollı búgin kútpegen jerden álemdik reıtıngide 185-oryndaǵy amerıkalyq Artýr Ferıden utylyp qaldy – 6:7 (1:7), 4:6, 1:6. Sondyqtan A.Býblık barynsha sátti oınasa, qarjylaı tabysqa qosa reıtıngilik upaı qoryn da tolyqtyra alady. Qazaqstandyq tennısshi ótken jyly alǵashqy aınalymnan asa almaǵan bolatyn. 

Eske sala keteıik, budan buryn Aýstralııa ashyq chempıonatynda ıÝlııa Pýtıntsevanyń sensatsııa jasap, jeńiske jetkenin jazǵan edik. 

Sondaı-aq Zańǵar Nurlanuly qazaqstandyqtardan alǵash ret Aýstralııadaǵy týrnırdiń shırek fınalyna shyqty.