Aleksandr Býblık alǵash ret topyraq tósenishindegi týrnırde top jardy

ASTANA. KAZINFORM — Qazaqstannyń birinshi, álemniń 34-raketkasy Aleksandr Býblık Gshtaad (Shveıtsarııa) ATP 250 týrnırinde úzdik shyqty.

Qazaqstandyq tennısshi osyǵan deıin ATP týrnırlerinde 12 ret fınalǵa shyǵyp, sonyń beseýinde chempıon atanǵan. Sondaı-aq bul — Býblıktiń topyraq tósenishindegi jarystaǵy alǵashqy fınaly.

Otandasymyzǵa sheshýshi básekede dúnıejúzilik reıtıngide 109-orynda turǵan Hýan-Manýel Serýndolo qarsy keldi. Argentınalyq sportshyny ońaı shaǵylatyn jańǵaq deýge bolmas. Ol osy jarys barysynda álemniń 13-raketkasy, norvegııalyq Kasper Rýýdty 6:2, 1:6, 6:3 esebimen jeńip ketken. 

Fınaldyq matchty qarsylastar breık almasýmen bastady – 1:1. Býblık partııany breıkpen támamdaı aldy – 6:4. 

Ekinshi sette esep 2:2 bolǵan mezette Serýndolo breık jasap ketti – 3:2. Degenmen qazaqstandyq sportshy tarazy basyn teńestirdi – 4:4. Biraq sol boıda qatelikke boı aldyryp, óz geımin berip qoıdy – 4:5. Serýndolo setke dop bergende, óz múmkindigin jibergen joq – 6:4. 

Úshinshi, sheshýshi partııada Býblık breık jasap, 5:2 esebimen alǵa shyqty. Aqyry oıyndy jeńispen túıindeı bildi – 6:3.

2 saǵat 7 mınýtqa sozylǵan básekede Býblık 13 eıspen birge 14 breık-poınttyń tórteýin óz enshisine jazdy. Serýndolo 1 eıs jasap, 10 breık-poınttyń úsheýin paıdalandy. 

Osylaısha Aleksandr Býblık alǵash ret topyraq tósenishindegi týrnırde jeńimpaz boldy. Bul – onyń sporttyq jolyndaǵy ATP jarystaryndaǵy altynshy, bıylǵy ekinshi tıtýly.

Eske sala keteıik, budan buryn Býblıktiń Shveıtsarııadaǵy týrnırde chempıondyq ataq úshin talasatynyn jazǵan edik.

Sondaı-aq Vashıngton týrnırinde Beıbit Juqaev irikteý saıysynyń fınalyna shyqty.