Aleksandr Býblık álemdik reıtıngide TOP-40-qa jýyqtady

ASTANA. QazAqparat – Kásibı tennısshiler qaýymdastyǵy (ATP) jańartylǵan reıtıngini jarııa etti, dep habarlaıdy QazAqparat tilshisi.

Qazaqstannyń birinshi raketkasy Aleksandr Býblık álemdik reıtıngide 44-ten 41-satyǵa kóterildi. Sóıtip TOP-40-qa jaqyndady.

Frantsııadaǵy Metts týrnıriniń fınalynda A.Býblıkti utqan ıtalııalyq Lorentso Sonego 65-ten birden 45-orynǵa shyqty.

Qazaqstandyqtardan Portýgalııadaǵy jarystyń jartylaı fınalyna deıin jetken Tımofeı Skatov 242-den 233-ke joǵarylady. Ol Qazaqstannyń úshinshi raketkasy atandy. Mıhaıl Kýkýshkın 214-ten 218-ge, Dmıtrıı Popko 219-dan 235-ke, Denıs Evseev 263-ten 270-ke syrǵydy.

Álemdik reıtıngide burynǵysha ıspanııalyq Karlos Alkaras kósh bastap keledi. Norvegııalyq Kasper Rýýd ekinshi, ıspanııalyq Rafael Nadal úshinshi orynda.

Metts jarysynda sátsiz óner kórsetip, óz upaılaryn qorǵaı almaǵan Polsha ókili Hýbert Hýrkachty ıtalııalyq ıAnnık Sınner yǵystyryp, 10-orynǵa jaıǵasty.

Eske sala keteıik, budan buryn Aleksandr Býblıktiń Frantsııadaǵy týrnırdiń fınalynda jeńilip qalǵanyn, Elena Rybakınanyń álemdik reıtıngide 25-orynǵa syrǵyǵanyn jazǵan bolatynbyz.

Foto: ktf.kz