Aleksandr Býblık AQSh-taǵy týrnırdiń jartylaı fınalyna shyqty
Qazaqstandyq tennısshi shırek fınalda álemniń burynǵy birinshi, qazirgi 52-raketkasy, ulybrıtanııalyq Endı Marreımen kúsh synasty.
Bıyl tennısshiler ózara eki ret kezdesip, Indıan-Ýellste (AQSh) A.Býblık 7:6 (11:9), 6:3 esebimen utqan edi. Alaıda keıin Shtýtgartta E.Marreı 6:3, 7:6 (7:4) esebimen ese qaıyrdy.
Bul joly birinshi partııada breık jasaǵan qazaqstandyq tennısshi basym tústi - 7:5.
Ekinshi setti de Býblık breıkpen bastaǵanymen, ile-shala Marreı teńestirip úlgerdi - 1:1. Degenmen taǵy bir breık jasaǵan Aleksandr 5:3 esebimen alǵa ketti. Aqyry sol basymdylyqty ýysynan shyǵarǵan joq - 6:4.
Bir saǵat 47 mınýtqa sozylǵan kezdesýde Býblık 12 eıspen birge 4 breık-poınttyń úsheýin múlt jibergen joq. Qarsylasy 1 eıs, 1 breıkpen kózge tústi.
A.Býblık júlde qory 595 myń AQSh dollaryna jýyqtaıtyn jarystyń fınalyna shyǵý úshin aýstralııalyqtar, álemniń 74-raketkasy Djeıms Dakvort nemese reıtıngte 102-satydaǵy Djeıson Kýblerdiń qaı jeńgenimen talasady.
Taǵy bir qazaqstandyq Aleksandr Nedovesov serbııalyq Nıkola Kachıchpen birge juptyq synda Bastad (Shvetsııa) ATP 250 jarysynyń fınalyna shyǵa almady.
Olar dodanyń ekinshi raketkalary, ıtalııalyqtar Sımone Bolellı - Fabıo Fonınıge ese jiberdi - 7:5, 4:6, 7:10.
Eske sala keteıik, budan buryn ıÝlııa Pýtıntsevanyń Býdapesht týrnıriniń jartylaı fınalyna shyqqanyn jazǵan bolatynbyz.
Sondaı-aq elordada 16 eıs jasaǵan qazaqstandyq tennısshi jartylaı fınalǵa ótti.
