Aleksandr Belovıch: Elordada baspana qurylysy álemdik rekordqa jetti
NUR-SULTAN. QAZAQPARAT – Qazaqstanda qurylys salasynda tańǵajaıyp órleý bar. «Bazis-A» korporatsııasy dırektorlar keńesiniń tóraǵasy Aleksandr Belovıch Prezıdenttik jastar kadr rezerviniń múshelerimen kezdesýde osyndaı pikir bildirdi, dep habarlaıdy QazAqparat tilshisi.
«Qazaqstanda qurylys salasy keıingi jyldary, ásirese bıyl keremet órleýdi bastan keshirip otyr. Memlekettik tapsyrys ta, jeke qurylys jobalary da óte kóp. Men sizderge aıtaıyn, buǵan deıin jyldar boıy 1991 jylǵy turǵyn úıdi paıdalanýǵa berý kórsetkishin eńsere almaı keldik. Sovet kezeńinen qalǵan memlekettik baǵdarlama bar edi. Sol baǵdarlama aıasynda Qazaqstan bir jylda 11,5 mln sharshy metr turǵyn úı qoldanysqa bergen. Osy mejeni birneshe jyl buryn ǵana eńserdik», - dep eske aldy bıznesmen jastarmen kezdesýde.
Sondaı-aq, ol bıyl el astanasy baspana qurylysy boıynsha rekordtyq kórsetkishke qol jetkizgenin aıtty.
«Bes jyl 1991 jyldyń mejesin eńsersek, bıyl 20 mln sharshy metr turǵyn úı paıdalanýǵa berilmek. Jalpaqtap aıtsaq, eldegi ár adamǵa bir sharshy metrden astam baspana keledi degen sóz. Álemde mundaı kórsetkish óte az. Mysaly Reseı Federatsııasynda jylyna bir adamǵa 0,5-0,6 sharshy metr baspana salynady. Al bizde bir adamǵa - 1 sharshy metr. Odan ári Úkimettiń jospary munymen shektelmeıdi. Bizdiń aldymyzda jylyna paıdalanýǵa beriletin baspananyń kólemin bir adamǵa 1,2-1,3 sharshy metrge deıin ulǵaıtý mindeti tur. Nur-Sultanda jylyna adam basyna 3 sharshy metr turǵyn úı salynady. Bul, tipti, álemdik rekord bolýy da múmkin. Mysaly, Máskeýde bir adamǵa 0,3 sharshy metr baspana salynady. Mine, qurylys salasynyń damý qarqyny osyndaı», - dedi Aleksandr Belovıch.
