Alek Boldýın túsirilimde atyp óltirgen operator: Fılmniń rekvızıtory kináli dep tanyldy

ASTANA. KAZINFORM - «Tot» fılminiń rekvızıtory Hanna Gýterres-Rıd túsirilim alańyndaǵy operator áıel Galına Hatchınstiń ólimine kináli dep tanyldy. Túsirilim kezinde qarý-jaraqqa Gýterres-Rıd jaýapty bolǵan, al sot alqasy ol bos patrondardyń arasynda atys patronynyń bolýyna kináli degen qorytyndyǵa keldi, dep jazady VVS.

Ýkraınalyq operator Galına Hatchıns 2021 jyldyń qazan aıynda AQSh-ta «Tot» fılmin túsirý kezinde mert boldy.

Fılmniń basty rólin oınaýshy ári prodıýseri Alek Boldýın revolvermen qozǵalysty qaıtalap jatyp, shúrippeni basqanda, qarý oqtaýly turǵany belgili boldy. 

Oq Hatchınsti óltirip, fılmniń rejısseri Djoel Soýzany jaralady.

Alek Boldýın de adam óltirdi degen aıyppen sot aldynda jaýap beredi.

Rekvızıtor isine qatysty úkim ony qorǵaýǵa kómektesýi múmkin: onyń advokattary jaýyngerlik oq túsirilim alańyna Gýterres-Rıdtiń kinásinen kelgenin aıtyp, klıentteriniń bul isten beıhabar ekenin alǵa tarta alady.

Hanna Gýterres-Rıd úsh jylǵa bas bostandyǵynan aıyrylýy múmkin.

Aıyptaýshy tarap sotta onyń Nıý-Meksıkodaǵy túsirilimge úıden ózimen birge jeke oq-dári qorabyn alyp ketkenin jáne bul patrondar kezdeısoq túsirilimge qajetti oqtarmen aralasyp ketkeni týraly dálelder keltirdi.

Nátıjesinde, prokýrordyń málimdeýinshe, Gýterres-Rıdtiń nemquraılyǵy men jaýapsyzdyǵy saldarynan oq kamera aldynda daıyndyq jasap turǵan Alek Boldýın qolyndaǵy rekvızıtti revolverden tabyldy.

Sot alqasy úsh saǵat talqylap, úkim shyǵardy.

Hatchıns qaıtys bolǵannan keıin «Tot» fılminiń túsirilimi toqtatyldy. Biraq ótken jyly fılmniń komandasy ony Galınany eske alý úshin aıaqtaýdy uıǵaryp, onyń jesiri Mettıý Hatchınsti atqarýshy prodıýser retinde shaqyrdy.