Aldyn-ala málimetter boıynsha, Shyǵys Qazaqstanda 1157 úıdi sý basqan, onyń 536-y - qalpyna keltirýge jaramaıdy
ÓSKEMEN. Naýryzdyń 31-i. QazAqparat /Lıýdmıla Malko/ - Naqtylanǵan málimetter boıynsha, Shyǵys Qazaqstanda tasqyn sý tóngen aýmaqtardan kóshirilgen adamdardyń sany 7406 adamdy qurady.
Qazirgi tańda 6007 adam úılerine oraldy, dep habarlady oblys ákiminiń baspasóz qyzmetinen.
Apat aýmaǵyndaǵy jumystarǵa 356 tehnıka men jeke quramnyń 247 adamy jumyldyrylyp otyr. Aldyn-ala málimetter boıynsha, 1157 úıdi sý basqan, onyń ishinde 536 úı - budan ári turýǵa jaramaıdy. Sondaı-aq, tasqyn sýdyń saldarynan 16 679 bas usaq mal, 2475 iri qara mal, 556 jylqy qyrylyp qaldy.
Búgin aımaqqa ekikúndik jumys saparymen birinshi vıtse-premer Ómirzaq Shókeevtiń barǵanyn QazAqparat budan buryn habarlaǵan bolatyn. Ó.Shókeev óńirdegi tasqyn sýdyń jaǵdaıyn óz kózimen kórý úshin Zaısan, Tarbaǵataı, Úrjar, Zyrıan aýdandaryn, sondaı-aq birqatar gıdrotehnıkalyq nysandardy aralaıdy.
Al erteń tústen keıin Ómirzaq Shókeevtiń qatysýymen Tótenshe jaǵdaılar jónindegi oblystyq shtabtyń májilisi ótedi.
