Aldyn ala boljam boıynsha, Ystanbuldaǵy shabýyldan qazaqstandyqtar zardap shekken joq - SІM
ASTANA. QazAqparat - Ázirge, aldyn ala boljam boıynsha, Ystanbuldaǵy túngi klýbta bolǵan shabýyldan zardap shekken otandastarymyz joq.
Bul týraly QazAqparat tilshisine QR SІM baspasóz qyzmetiniń basshysy Ánýar Jaınaqov telefon arqyly habarlady.
«Bizdiń dıplomattar jergilikti bılikpen jáne quqyq qorǵaý organdarymen udaıy baılanysta. Aqparat áli de tekserilýde», - dedi Ánýar Jaınaqov.
Budan buryn málim etilgendeı, Reina túngi klýbyndaǵy shabýyl saldarynan 35 adam qaza taýyp, jaralanǵandar sany 40-qa jetken edi. Bul týraly Ystanbulda júrgen otandasymyz Nurat Ilııas jergilikti bılik málimetterine silteme jasap habarlady.
Santa Klaýs kostıýmin kıgen eki er adam "Reına" túngi klýbyna basyp kirip, beıbereket oq atqan. Olar shabýyl jasaǵan kezde ǵımarattyń ishinde 700-800 adam bolǵan.
«2017 jyl Túrkııanyń iri qalasynda terrorlyq aktimen bastaldy. Salafıtter túngi klýbqa kirip avtomattan jappaı oq ata bastady. Olardyń pikirinshe, Jańa jyldy merekeleý - bul haram. Jáne mundaı paıymdaý áleýmettik jelide taralǵan»,-dep jazdy Nurat Ilııas Facebook-te. Ol Ystanbul ýnıversıtetinde «tıýrkologııa» mamandyǵy boıynsha doktorantýrada oqıdy. Úsh jyldan beri osy qalada turady.
Ystanbul túngi klýbynda oq atqan lańkesterdiń biriniń kózi joıyldy, dep habarlady Guardian.
