Aldyn ala boljam boıynsha «Kaspıan Palas» turǵyn úı keshenindegi órttiń sebebi qurylys jumystarynyń saldarynan bolýy múmkin
annyń 29-y. QazAqparat /Rýslan Ǵabbasov/ - Elordadaǵy Esildiń sol jaǵalaýynda "Kaspıan Palas" turǵyn úı keshenindegi órttiń sebebi, aldyn ala boljam boıynsha qurylys jumystarynyń saldarynan bolýy múmkin. Búgin bul jaıynda atalǵan órtti aýyzdyqtaý kezinde Astana qalasy Tótenshe jaǵdaılar departamentiniń órtke qarsy qyzmetiniń
polkovnıgi Qaıyrgeldi Meıramov aıtty, dep habarlaıdy QazAqparat.
«Qurylysshylardyń sózine qaraǵanda, osy úıdiń joǵary qabatynyń balkonynda ızolıatsııalyq jumystar júrgizilgen. Aldyn ala boljamdar boıynsha órttiń shyǵýy sebebi osydan bolýy yqtımal. Órtti tolyǵymen sóndirip bolǵannan keıin barlyǵyn anyqtaıtyn bolamyz», dedi Q. Meıramov.
Órt ekinshi dáreje sanatyna jatqyzylyp otyrǵanyna toqtalǵan ol, tilsiz jaýdy aýyzdyqtaýǵa 7 bólimsheniń órt sóndirýshileri jumyldyrylǵanyn, jalpy 10-nan astam arnaıy mamandandyrylǵan órt sóndirý tehnıkalary tartylǵanyn aıtty.
«Órt shamamen 12. 45-ter kezinde aýyzdyqtaldy. Qazir jalyn sharpyǵan jerlerge qosymsha sý shashý jumystary men tekserý sharalary júrgizilýde», dedi Q. Meıramov.
Budan buryn habarlaǵanymyzdaı, Astanadaǵy Esildiń sol jaǵalaýynda ornalasqan, ıaǵnı 19-shy kósheniń ońtústik jaǵynda jańadan salynyp jatqan "Kaspıan Palas" turǵyn úı kesheniniń eń joǵary qabatyn órt sharpyp, janǵan bolatyn. Órttiń bastalýy týraly habar 11.40-ta túsken.
Aıta keteıik, atalǵan qurylys nysanynyń bas merdigeri «Caspian Servise Kazakhstan» JShS. Nysan qurylysyn «Samuryq - Qazyna» jyljymaıtyn múlik qory» aktsıonerlik qoǵamy qarjylandyryp jatyr. Qurylys nysanyn 2010 jyldyń tórtinshi toqsanynda aıaqtaý josparlanyp otyr.
