Aldyn ala aqparat: 443 myń azamattyń nesıesin memleket pen bank jaýyp beredi
NUR-SULTAN. QazAqparat - Aldyn ala berilip otyrǵan aqparatqa sáıkes, QR Prezıdenti Qasym-Jomart Toqaevtyń «Qazaqstan Respýblıkasy azamattarynyń qaryz júktemesin azaıtý týraly» Jarlyǵyna sáıkes, 443 myń qazaqstandyqtyń nesıesi keshiriledi, dep habarlaıdy QazAqparat tilshisi.
«Jańa Jarlyqqa saı, nesıe boryshy óteletin halyqtyń sanatyn aıttyq. Eńbek jáne halyqty áleýmettik qorǵaý mınıstrliginiń bazasy boıynsha Qazaqstanda joǵaryda atalǵan sanat boıynsha (kópbalaly otbasylar, múgedek balalary bar otbasylar, jalǵyz asyraýshysynan aırylǵan otbasylar, ataýly áleýmettik kómek alatyndar, jetim balalar) 933 myń azamat bar. Olardyń tolyq málimetteri tirkelgen. Sondyqtan, ekinshi deńgeıli banktermen kezdesý kezinde kimniń nesıe alǵanyn nemese almaǵanyn anyqtaımyz. Álbette, 933 myń azamattyń bári de nesıe alǵan joq. Aldyn ala aqparat boıynsha, mundaı azamattardyń sany 443 myń bolyp otyr», - dedi Premer-Mınıstrdiń orynbasary Gúlshara Ábdiqalyqova búgin Úkimettiń baspasóz ortalyǵynda.
Aıta ketsek, keshe QR Prezıdenti Qasym-Jomart Toqaev «Qazaqstan Respýblıkasy azamattarynyń qaryz júktemesin azaıtý týraly» Jarlyqqa qol qoıǵan bolatyn.
Elimizdegi áleýmettik turmysy tómen toptaǵy azamattar - kópbalaly otbasylar, múgedek balalary bar otbasylar, jalǵyz asyraýshysynan aırylǵan otbasylar, ataýly áleýmettik kómek alatyndar jáne jetim balalar túrli sebeptermen qıyn jaǵdaıǵa tap bolyp, óz attaryna alǵan nesıelik mindettemelerin oryndaı almaı otyr.
Tikeleı jáne ataýly qarjylaı kómek retinde joǵaryda atalǵan sanattaǵy azamattar úshin memleket ekinshi deńgeıli bankter men shaǵyn qarjy uıymdarynan alynǵan jalpy mólsheri 300 myń teńgege deıin negizgi nesıeni jáne oǵan eseptelgen syıaqyny óteıdi.
