Aldymyzda elimiz buryn-sońdy kórmegen syn-tegeýrinder turǵanyn túsinemiz – Kelimbetov

NUR-SULTAN. QazAqparat – Strategııalyq josparlaý jáne reformalar agenttiginiń tóraǵasy Qaırat Kelimbetov Prezıdent tóraǵalyǵymen ótken Reformalar jónindegi Joǵary keńestiń úshinshi otyrysynda qandaı máseleler qyzý talqylanǵanyn aıtyp berdi, dep habarlaıdy QazAqparat tilshisi.

«Reformalar jónindegi Joǵary keńestiń búgingi otyrysynda memlekettik josparlaýdyń jańa júıesin kóp talqyladyq. Pikirtalasqa qatysýshylardyń bárine de bul suraq óte qyzyqty dep oılaımyn. Sebebi kóp másele sheshimdi qabyldaý júıesine tikeleı baılanysty. Sondyqtan bul júıeni qalaı quryp, birinshi kezekte qandaı shara qabyldanýy kerektigi jóninde másele kóp talqylandy. Osynyń nátıjesinde Joǵary keńestiń otyrysynan keıingi áreketter legin belgileýde óte oıly sheshim qabyldandy dep oılaımyn», - dedi Qaırat Kelimbetov sarapshy Rahym Oshaqbaevpen «Habar 24» arnasynda júrgizgen suhbatynda.

Onyń aıtýynsha, memlekettik josparlaý júıesi fýndamentaldy negizge berik baılanǵan.

«Memlekettik josparlaý júıesi Qazaqstan 30 jyl buryn tańdap alǵan ekonomıkalyq jáne saıası baǵdardy maquldaıdy. «Qazaqstan 2030», «Qazaqstan 2050» strategııalarymen birge Ult jospary – bes ınstıtýtsıonaldyq reformanyń qabyldanǵanyn bilesizder. Olardyń bári de mańyzdy. Endigi kezekte biz qolǵa alatyn reformalar – osy reformalardy aıaqtaýdy, jalǵaýdy kózdeıdi. Osy reformalardyń barlyǵy memlekettik basqarýdy jetildirýdi, jańǵyrtýdy kózdeıdi, azamattardyń memlekettik ınstıtýttarǵa senimin nyǵaıtýdy, ekonomıkany ártaraptandyrýdy maqsat tutady. Biz qazir aldymyzda buryn-sońdy elimiz kórmegen syn-tegeýrinder turǵanyn túsinemiz. Sol sebepti belgili bir reformalar beıimdelýdi talap etedi. Sol sebepti Úkimette sheshim qabyldaýdyń óte yńǵaıly júıesin qurýdy tapsyrdy», - deıdi ol.

Eske sala ketsek búgin Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótken bolatyn. Jıynda Qazaqstan Respýblıkasynyń 2025 jylǵa deıingi ulttyq damý josparyn ázirleý, Memlekettik josparlaýdyń jańa júıesi, Memlekettik basqarýdy damytýdyń 2030 jylǵa deıingi tujyrymdamasy, 2021-2025 jyldarǵa arnalǵan jekeshelendirý josparynyń jobasy, sondaı-aq, Jedel reformalar paketi jáne ulttyq halyq sanaǵyn ótkizý máseleleri qarastyryldy. Otyrysta Prezıdent memlekettik basqarýdy damytý úshin is-qımyldar josparyn qabyldaýdy tapsyrdy.