Aldymyzda búgingi medıanyń barlyq talaptaryna jaýap berý mindeti tur - Erlan Qarın

ASTANA. QazAqparat - Taıaýda «Qazaqstan» RTRK» AQ Basqarma tóraǵasy qyzmetine taǵaıyndalǵan Erlan Qarın Feısbýktaǵy paraqshasynda elimizdegi eń iri medıa qurylymdaǵy jańa qyzmetine qatysty pikirin jetkizdi.

«Teleradıo kesheni buǵan deıin de jýrnalıstıkanyń, aǵartýshylyqtyń, el damýyndaǵy bıik jetistikterdi kórermen qaýymǵa jetkizýdiń biregeı qaınary bolyp keldi. Aldymyzda ujymnyń jumysyn odan ári jetildirý, dástúrin saqtaý arqyly zamana kóshine ilesip, talǵampaz kórermenderdiń údesinen shyǵý, búgingi medıanyń barlyq talaptaryna jaýap berý mindeti tur. QR Aqparat jáne kommýnıkatsııalar mınıstri Dáýren Abaev myrza teleradıokorporatsııanyń aldynda naqty jańa basymdyqtardy aıqyndady. Júktelgen jańa mindetterdi atqarýǵa bar kúshimizdi salamyz», dep jazdy korporatsııanyń jańa basshysy.

Korporatsııada jalpy sany 2 myńnan astam adam qyzmet etedi. Onyń quramynda «Qazaqstan» Ulttyq telearnasy, «KAZsport» telearnasy, «Balapan» telearnasy, Qazaq radıosy, «Shalqar» radıosy, «Astana» radıosy, «Classic» radıosy sekildi óz aýdıtorııasyn qalyptastyrǵan, kórermenderi men tyńdarmandaryna sapaly kontent usynyp kele jatqan úlken jobalar bar. Odan bólek aımaqtyq arnalar men birneshe ınternet saıt jumys isteıdi. 

«Qazaqstan» Teleradıokorporatsııasy - Qazaq aqparat keńistiginiń qara shańyraǵy. Bul jerde Qazaq rýhanııatyna qyzmet atqarǵan, elimizdiń aqparat salasyna eńbegi sińgen kóptegen áıgili tulǵalar, qazaq jýrnalıstıkasynyń maıtalmandary qyzmet atqardy. Elimizdegi eń iri medıa qurylymda qyzmet atqarý - birneshe urpaqtyń taǵdyryna jalǵasqan sabaqtastyqty kótere bilý, ári ıisi qazaqtyń aldynda jaýapkershilik júgin arqalaýmen teń. Eń aldymen, osyndaı jaýapty jumysty senim artyp tapsyrǵan Elbasyǵa alǵys aıtqym keledi. Qandaı qyzmette bolsam da Elbasynyń qoldaýyn, demeýin kórip kelemin. Bul joly da Memleket basshysynyń seniminen shyǵýǵa tyrysamyn», - dep jazdy ol. 
Erlan Qarın burynǵy áriptesteri QR Prezıdenti janyndaǵy Strategııalyq zertteýler ınstıtýtymen aldaǵy ýaqytta da baılanysta bolatyndyǵyn toqtala ketti. «QSZI ujymyna, osy sala boıynsha áriptes bolǵan tulǵalarǵa erekshe rızashylyǵymdy bildiremin. QR Prezıdenti janyndaǵy Strategııalyq zertteýler ınstıtýtynda eki jarym jyl ishinde áriptesterdiń tabandylyǵy men kásibıliginiń arqasynda tabysty jumystar atqardyq. Aldaǵy ýaqytta da áriptestik baılanysta bolamyz degen senimdemin», - dedi Qarın.

Eske sala ketsek, 9 aqpanda QR Aqparat jáne kommýnıkatsııalar mınıstri Dáýren Abaev «Qazaqstan» RTRK» AQ ujymyna jańa basshy Erlan Qarındi tanystyrǵan bolatyn.