Aldymen - kómek, keıin - aqsha: lıtvalyq dárigerler tájirıbe bólisti
Qazaqstandyq jáne lıtvalyq mamandar alǵashqy medıtsınalyq kómek kórsetýdi damytý, ana men balany qorǵaý, mamandandyrylǵan qyzmet túrlerin biriktirý jáne kópbeıindi klınıkalardy qurý máselelerin talqylady.
Sondaı-aq smart-medıtsına, tsıfrlandyrý, aqparattyq tehnologııalardy damytý máseleleri sóz boldy.
Lıtva ýnıversıteti ınnovatsııa men damý departamentiniń meńgerýshisi Pavalkıs Daınıýs Lıtvadaǵy áleýmettik medıtsınalyq saqtandyrý tájirıbesi týraly aıtyp berdi.
«Bizdiń saqtandyrý medıtsınasynda gospıtaldar arasynda resýrstar naqty bólingen. Jaqsy jumys jasaıtyn, jasandy kezekter týǵyzbaıtyn, naýqastarǵa urysyp, árli-berli júgirtpeıtin, jaqsy emdeıtin emhanalarda adamdardyń sany arta túsedi. Sáıkesinshe, memlekettik saqtandyrý kompanııalarynan bólinetin qarjy da artady. Kóbisi naýqastarǵa qyzmet kórsetý máselesin túbegeıli ózgertýge májbúr. Eger aýrýhana kassa kólemin 10 paıyz artyq japsa, keler jyly 5 paıyzǵa kóp kelisimshart alady. Eger emhana tapsyrysty 100 paıyzǵa oryndasa, kelesi jyly syrqattyń jáne medıtsınalyq qyzmetterdiń túrine baılanyssyz, tapsyrysty kepildi túrde alady», - dedi Pavalkıs Daınıýs.
Maman Lıtva ýnıversıtetteriniń ózge elderdiń oqý oryndarymen baılanysy týraly aıtyp berdi.
«Ýnıversıtet emhanasynyń eki aktsıoneri bar. Aktsııalardyń 50% memleketke tıesili bolsa, 50% ýnıversıtettiń menshiginde. Qos tarap bir-biriniń kelisiminsiz eshqandaı sheshim qabyldaı almaıdy. Ýnıversıtet basshylyǵyn da ortaq komıssııa saılaıdy. 20 jyldyq tájirıbege sensek, júıe tıimdiligin dáleldedi. Gospıtalde tájirıbeden ótpegen adam emhanaǵa qabyldanbaıdy», - dedi maman.
Lıtvalyq saqtandyrý modelinde óz-ózin jumyspen qamtyǵan azamattar saqtandyrý jarnalaryn engizip otyrady nemese aqyly medıtsınaǵa qarala alady.
«Mundaı azamattar aı saıyn 30-40 dollar tólep, saqtandyrý paketin paıdalana alady. Sondaı-aq saqtandyrý jarnasyn tólemeı, aqyly medıtsınalyq qyzmetke júgine alady. Lıtva azamattaryna shuǵyl medıtsınalyq kómek qarastyrylǵan. Alaıda, emdelgen soń olardan aqy talap etiledi. Aldymen - kómek, keıin - aqsha qaǵıdatymen jumys jasaıdy», - dedi Pavalkıs Daınıýs.
Mamannyń aıtýynsha, dárigerler jumysy qabyldanǵan naýqastar sanyna qaraı baǵalanady.
Kezdesý barysynda qalalyq Densaýlyq saqtaý basqarmasy men Lıtva densaýlyq ǵylymy ýnıversıteti, S.Asfendııarov atyndaǵy Qazaq ulttyq medıtsınalyq akademııasy arasynda úshjaqty Memorandýmǵa qol qoıý týraly usynys aıtyldy.
«Biz saqtandyrý júıesine 15 jyl buryn kóshtik. Osy ýaqytta nátıjeni kórip otyrmyz. Ótemaqy men basqa da máseleler boıynsha Lıtvanyń qateligin Qazaqstan qaıtalamasyn. Jas dárigerlerdi daıyndaýǵa, áriptestik ornatýǵa daıynbyz. Jańa júıeniń jemisin jas urpaq ósken kezde anyq baıqaıtyn bolasyzdar», - dedi P.Daınıýs.
