Aldymen Federatsııa prezıdenti saılanady, keıin quramanyń bas bapkeri taǵaıyndalady
ASTANA. QazAqparat - Qazaqstan fýtbol federatsııasy «Astana» fýtbol klýbyn alǵa jetelep júrgen Stanımır Stoılovtyń ulttyq quramanyń bas bapkeri etip taǵaıyndalatyny týraly shyqqan áńgimege qatysty pikir bildirdi, dep habarlaıdy «QazAqparat» HAA tilshisi.
«Kezekten tys Konferentsııa ótken kezde, ıaǵnı 10 aqpan kúni ǵana ulttyq quramanyń bas bapkeriniń kim bolatyny belgili bolady. Sol kezde Qazaqstan fýtbol federatsııasynyń jańa prezıdenti saılanady. Ózderińiz biletindeı, Seıildá Baıshaqov otstavkaǵa ketken bolatyn. QFF-ty kimniń basqaratyny málim bolǵan ýaqytta bas bapkerdiń kim bolatyny anyqtalady», - deıdi QFF baspasóz hatshysy Erbol Qaıyrov.
Buǵan deıin birshama BAQ kózderi ázerbaıjandyq «Gabala» fýtbol klýbynyń bas jattyqtyrýshysy Roman Grıgorchýk «Astanany», al Stanımır Stoılov ulttyq quramany basqarady degen málimet taratqan bolatyn.
«Astana» fýtbol klýby atalǵan málimettiń shyndyqqa sáıkes kelmeıtinin habarlady.
«Qazirgi ýaqytta komanda jospar boıynsha jumys júrgizip jatyr. Jattyqtyrýshylar shtabynda eshqandaı ózgeris joq», - dep habarlaıdy klýbtyń baspasóz qyzmetinen.
Aıta ketsek, Seıildá Baıshaqov otstavkaǵa ketkennen keıin aımaqtyq federatsııalardyń ókilderi biraýyzdan atalǵan orynǵa Ádilbek Jaqsybekovtiń kandıdatýrasyn usynǵan edi. Al naqty sheshim 10 aqpanda Astanada ótetin kezekten tys konferentsııa kezinde qabyldanady.
