Aldııar Baırakımovtiń fılmi Ispanııadaǵy kınofestıvalge qatysady
ALMATY. QazAqparat - «Na granı» fılmi 13-17 mamyr Ispanııanyń astanasy Madrıdte ótetin Imagine India halyqaralyq kınofestıvaliniń Life atty konkýrstan tys baǵdarlamasy sheńberinde kórsetiledi, dep habarlaıdy QazAqparat «Qazaqfılm» kınostýdııasyna silteme jasap.
18 jyl buryn bastalǵan baıqaýda alǵashynda tek úndi kınosy kórsetilgen. Ýaqyt óte festıval keńeıip, azııalyq fılmderge baǵyttalǵan halyqaralyq dárejedegi baıqaýǵa aınaldy.
Otandyq jas rejısser Aldııar Baırakımovtiń fılmi kórsetiletin «Ómir» atty sektsııasynda adamgershilik qundylyqtardy nasıhattaıtyn fılmder usynylady. Bıylǵy festıvaldiń afıshasyn ıspandyq tanymal fotograf Alberto Bogo jáne dızaıner Lýıs Koderk jasap shyǵardy. Onda qıyndyqtarǵa tótep bere alatyn jáne óz ómirin ózi qadaǵalaı alatyn búgingi kúnniń zamanaýı áıeldiń obrazy beınelengen.
Esterińizge sala ketsek, «Na granı» fılmi bir-birine múldem uqsamaıtyn, alaıda taǵdyrlary kezdeısoq toǵysqan jasóspirimder týraly baıandaıdy. Otbasy jylýy men jaqyndarynyń qoldaýynan aıyrylǵan, tipti áleýmetpen til tabysa almaı júrgen olar bastaryn qaýipke tigedi.
«Dál qazir biz Germanııadaǵy festıvalge qatysyp jatyrmyz. Eýropa kórermenderi qazaq fılmderine úlken qyzyǵýshylyq tanytyp otyr. Sondyqtan da, bizdiń fılm Madrıdte kórsetiletinine óte qýanyshtymyn. Osy oraıda «Debıýt» shyǵarmashylyq birlestiginiń jetekshisi Anar Qashaǵanova men kórkemdik jetekshisi Dárejan Ómirbaevqa, sondaı-aq jas rejısserlerge árdaıym qoldaý kórsetip otyratyn «Qazaqfılm» kınostýdııasynyń ujymyna alǵysymdy jetkizgim keledi» - dedi rejısser Aldııar Baırakımov.
Byltyr «Na granı» fılmi Reseıdiń Anapa qalasynda ótken «Kınoshok» atty TMD jáne Baltyq elderi kınosynyń ashyq kınofestıvaliniń negizgi baıqaýyna qatysqan, sondaı-aq Belarýs elinde ótken «Lıstopad» halyqaralyq kınofestıvalinde úzdik stsenarıı úshin qazylar alqasynyń arnaıy júldesimen jáne ıÝNISEF qorynyń júldesimen marapattalǵan. Sonymen qatar, byltyr bul fılm «Úzdik debıýt» nomınatsııasy boıynsha Qazaqstan kınematografıster odaǵynyń «Qulager» júldesine ıe boldy.
