Aldyńǵy saılaýlarǵa qaraǵanda bul referendýmda halyqtyń belsendiligi joǵary – AQSh sarapshysy
ASTANA. KAZINFORM – Komıssııa músheleriniń arasynda da san túrli mamandyq ıeleri bar. Bul jóninde AQSh-taǵy Salyq jáne ınvestıtsııalar jónindegi halyqaralyq ortalyq ókili Ýeslı Aleksander Hıll málimdedi.
Halyqaralyq baıqaýshylarǵa qoldaý kórsetý ortalyǵyndaǵy brıfıngte ol Astanadaǵy ǵana emes, aýyldardaǵy ýchaskelerge de at basyn burǵanyn aıtty.
– Búgin tańerteń erte turyp, birneshe saǵat jol júrip, aýyldyq jerlerge bardym. Qaıtyp kele jatyp, aýyldardaǵy, qala syrtyndaǵy jáne shahardaǵy 13 ýchaskege bas suqtym. Ádettegideı halyqaralyq standarttar saqtalǵan saıası naýqanǵa kýá boldyq, – dedi amerıkalyq sarapshy.
Sondaı-aq ol komıssııa múshelerimen sóılesip, biliktiligine kóz jetkizgenin atap ótti.
– Negizinde, tek memlekettik qyzmetkerler ǵana komıssııa múshesi bolǵanyn qalamas edik. Al búgin kásipkerlerdiń, kitaphanashylardyń, muǵalimderdiń, órt sóndirýshilerdiń, tipti, atbeginiń de referendýmda qyzmet etip júrgenin kórdik, – dedi Ýeslı Aleksander Hıll.
Odan bólek ol baıqaýshylar máselesine toqtaldy.
– Bir jerde az, bir jerde kóp, biraq jalpy saıası partııa músheleri ýchaskelerde baıqaýshy bolyp júr. Sonymen qatar qoǵamdyq jáne azamattyq uıymdardyń ókilderi de osy qyzmetti atqaryp jatyr. Olar ár saǵatta qansha daýys berýshi kelgenin sanap otyr. Sonymen birge aldyńǵy saılaýlarǵa qaraǵanda bul referendýmda daýys berýshilerdiń belsendiligi joǵary ekenin aıtqan jón, – dedi halyqaralyq baıqaýshy.
Aıta keteıik buǵan deıin Londondaǵy qazaqstandyqtar tańǵy ýaqyttan beri referendýmda daýys berip jatqanyn jazǵanbyz.
