Aldyn ala aqparat: Aqtaý mańyndaǵy ushaq apatynan tiri qalǵan qazaqstandyqtar joq

ASTANA. KAZINFORM — Qazir Aqtaýda júrgen QR Premer-mınıstriniń orynbasary Qanat Bozymbaev áýe apatyna qatysty sońǵy málimetpen bólisti. Bul týraly Tengrinews.kz habarlaıdy.

Úkimet basshysy orynbasarynyń málimetinshe, áýe apatynan 38 adam mert boldy. 

— Tabylǵan adam deneleri nashar jaǵdaıda, kóbisi kúıip ketken, barlyq múrde jınaldy, endi máıithanada olardyń jeke bastary anyqtalady. Tiri qalǵan 29 adam, onyń ishinde eki bala bar, qazir zardap shekkender aýrýhanada. Olardyń ishinde 11 adamnyń jaǵdaıy turaqty aýyr, qalǵandarynyń háli ortasha, — dep baǵalady Qanat Bozymbaev. 

Odan bólek, portal tilshisi premer-mınıstrdiń orynbasarynan ushaq bortynda bolǵan qalǵan qazaqstandyqtardyń taǵdyryn naqtylady. 

— Ókinishke qaraı, búgingi kúnge deıin tiri qalǵandar týraly… ázirge, kim ekeni anyqtalmaǵan áıel bar. Ol es-tússiz, qujaty da joq, aýrýhanada jatyr. Qalǵan 29 (tiri qalǵandar) adamnyń arasynda birde-bir qazaqstandyq joq, jalpy 6 qazaqstandyq adam boldy, onyń ishinde eki bala bar, — deıdi ol.

Onyń aıtýynsha, apattyń mán-jaıyn anyqtaý Qazaqstannyń Bas prokýratýrasynyń, sondaı-aq Іshki ister mınıstrligi men áýe basqarmasynyń baqylaýymen júrgiziledi. 

— Oqıǵa bizdiń aýmaqta boldy, tergeýdi Bas prokýratýra, sondaı-aq Іshki ister mınıstrligi men áýe bıligi júrgizedi. Oqıǵa ornynda ázirbaıjandyq áriptester bar, olarda qatysady, — dep tolyqtyrdy Qanat Bozymbaev.

Buǵan deıin habarlanǵandaı, oqıǵa ornyna mınıstr Shyńǵys Árinov bardy. 

Aqtóbeden Aqtaýǵa dári-dármek jiberildi.