Aldymyzda tolyqqandy tsıfrlyq memleket qurý mindeti tur — Toqaev
ASTANA. KAZINFORM — Memleket basshysy Qasym-Jomart Toqaev Parlament palatalarynyń birlesken otyrysynda tsıfrlandyrý jáne jasandy ıntellekt salalaryndaǵy jumystarǵa toqtaldy.
— Aldymyzda tolyqqandy tsıfrlyq memleket qurý mindeti tur. Sizderdi tyńnan túren salyp, tsıfrlyq dáýirge jol ashqan depýtattar deýge bolady. Bizdiń elimizde bolsyn, álemde bolsyn — jalpy esh jerde jasandy ıntellektini zań turǵysynan retteıtin daıyn úlgi nemese tásil bolǵan joq.
Soǵan qaramastan, sizder elimizdiń osy saladaǵy ósip-órkendeýine berik negiz bolatyn tıimdi quqyqtyq júıeni qurýǵa eleýli úles qostyńyzdar. Men Memleket basshysy retinde muny joǵary baǵalaımyn, — dedi Prezıdent.
Onyń málimdeýinshe, jańa Konstıtýtsııa azamattardyń kıberkeńistiktegi derbes derekterin qorǵaýǵa kepildik beredi. Bul — Tsıfrlyq Qazaqstandy qurýdyń negizgi alǵysharty.
— Qazaqstan múldem jańa sıpattaǵy Tsıfrlyq kodeks pen «Jasandy ıntellekt týraly» Zań qabyldaǵan jahandaǵy alǵashqy elderdiń biri.
Bul qadam tolyqqandy Tsıfrlyq el bolý úshin zamanaýı ınfraqurylymdyq negiz qalyptastyrýǵa múmkindik berdi. Biz qazirdiń ózinde osy jumystyń naqty nátıjesin kórip otyrmyz.
Búginde elimiz «Úkimettiń jasandy ıntellektige daıyndyq ındeksine» sáıkes Ortalyq Azııada aldyńǵy qatarda tur. Biraq, bul — úlken joldyń basy ǵana.
Aldaǵy aýqymdy jumystyń negizgi baǵyt-baǵdary «Digital Qazaqstan» jalpyulttyq strategııasynda aıqyndaldy. Men bul qujatty maýsym aıynyń basynda bekittim.
Biz jasandy ıntellektini ekonomıkanyń barlyq negizgi salasyna engizip, memlekettik basqarýdyń sapasyn túbegeıli jaqsartýymyz kerek. Osy baǵytta alǵashqy mańyzdy sharalar qolǵa alyndy, — dedi Memleket basshysy.
Sonymen birge, ol qańtar aıynda bank qyzmeti salasyna qatysty jańa zańdarǵa qol qoıǵanyn atap ótti. Sol arqyly tsıfrlyq qarjy aktıvterin aınalymǵa engizýdiń naqty sharttary aıqyndaldy.
Sondaı-aq Prezıdent tapsyrmammen elimizdiń quqyqtyq negizin júıelep, tolyqqandy jańǵyrtýǵa múmkindik beretin Retteý jónindegi ıntellekt ortalyǵy quryldy. Bul qadam kásipkerlerdiń jumysyn edáýir jeńildetpek.
— «Bir tereze» qaǵıdaty boıynsha qyzmet kórsetetin «e-Government Business» ekojúıesin damytý arqyly bıznes úshin qolaıly orta qalyptastyrýǵa múmkindik týady, — dedi Prezıdent.
Aıta keteıik, buǵan deıin atalǵan birlesken otyrysta Prezıdent energetıkalyq nysandardy túbegeıli jańǵyrtý iske asatynyn málimdegen edi.
