Aldymen ekonomıka, sodan keıin saıasat – Jumanǵarın Pýtınniń Qazaqstanǵa kelýi jóninde
Premer-Mınıstr orynbasary Serik Jumanǵarın Reseı Federatsııasynyń prezıdenti Vladımır Pýtınniń Qazaqstanǵa sapary jóninde pikir bildirdi, dep habarlaıdy Kazinform.
Aıta keteıik, Memleket basshysy Qasym-Jomart Toqaevtyń shaqyrýymen 9 qarasha kúni Reseı Federatsııasynyń Prezıdenti Vladımır Pýtın Astanaǵa resmı saparmen keledi.
Prezıdentter Qostanaıda ótetin Qazaqstan men Reseıdiń XIX Óńiraralyq yntymaqtastyq forýmyna beınebaılanys rejıminde qatysady.
«Bul – bizdi tatý kórshilik, onyń ishinde meni qyzyqtyratyn saýda-ekonomıkalyq qatynastar baılanystyratyn memlekettiń kóshbasshysy. Bul forýmnyń uıymdastyrylyp kele jatqanyna bıyl 20 jyl boldy. Biz onda eń aldymen bizdiń eki el turǵyndary men bıznesiniń problemalaryn talqylaımyz. Bul forýmda aýyl sharýashylyǵyna úlken kóńil bólinedi. Ásirese aýyl sharýashylyǵyn tsıfrlandyrý, jastar taqyryby talqylanady. Sondyqtan munda qandaı saıasat bolýy múmkin? Biz tek qana ekonomıkalyq jáne saýda qatynastaryn talqylaımyz», - dedi S.Jumanǵarın Úkimette ótken brıfıngide tilshi saýalyna.
Onyń aıtýynsha, forýmda sarapshylar, óńir basshylary keledi. Óńirler arasynda eń aldymen saýda-ekonomıkalyq kelisimderge qol qoıylady.
«Aldymen ekonomıka, sodan keıin saıasat degen uǵym bar. Bizdiń Reseımen taýar aınalymymyz 27 mlrd dollarǵa jetti, búgingi tańda eń iri saýda seriktesimiz bolyp otyr. Ótken jyly eksport 9 mlrd dollar bolsa, bıyl eksport boıynsha ósip kelemiz. Bul turǵyda jaqsy ilgerilep kelemiz», - dedi Serik Jumanǵarın.
