Aldar kóse, tekshe, retromobıl - Almaty kóshelerinde qandaı nysandar boı kóteredi
ALMATY. QazAqparat - Jaqyn arada Almaty kóshelerinde Aldar kóse, tekshe, retromobıl paıda bolmaq. Bul týraly «PARK FEST» halyqaralyq músin jáne shaǵyn arhıtektýralyq formalar festıvalinde belgili boldy, dep habarlaıdy QazAqparat tilshisi.
Atalǵan shara aıasynda qazaqstandyq jáne sheteldik sýretshi músinshiler qalany túrli art nysandarmen árlep jatyr. Atap aıtqanda, Abaı Dostyq kósheleri qıylysynyń tarıhı kelbetin qaıtarýǵa kúsh salynyp jatyr.
Jer asty jolyna kirer joldardyń shatyry alyp tastalǵan. Úshinshi kireberiste «Ótý» degen jazba ilinip tur. ıAǵnı, osydan birneshe jyl buryn bul kósheniń kelbeti osyndaı bolatyn. Osylaısha «Arman» kınoteatry ondaǵan jyldar burynǵy keıpine qaıta endi. Bul jerde sondaı-aq, aport tıelgen retromobıl paıda boldy. Bul art nysandy Jas sýretshiler ortalyǵynyń ónerpazdary saldy.
Nazarbaev pen Qarasaı batyr kósheleriniń qıylysynda Aldar kóseniń temirden jasalǵan obrazy paıda boldy. Músin eski avtomobıldiń bólshekterinen jasalǵan. Músin avtory - QR sýretshiler odaǵynyń múshesi, sýretshi, músinshi Rýslan Aqanaev.
Nazarbaev kóshesinde erekshe sham paıda boldy. Óte úlken tekshe formasyn QR Eńbegi sińgen mádenıet qaıratkeri, grafık, QR sýretshiler odaǵynyń múshesi Abdýahat Muratbaev pen ART SPACE galereıasynyń músheleri saldy.
«Tekshe pishindes aspasham oıýlanǵan metall kesindilermen qorshalǵan. Bul nysandar qalalyqtardyń jıi jınalatyn ornyna aınalatynyna senim mol. Almaty týrıster arasynda da vızýaldy obrazymen este qalatyn bolady»,- delingen nysannyń tanystyrylymynda.
Nazarbaev-Qarasaı kósheleriniń qıylysynda asa úlken vazalar paıda boldy. Nysandy QR Eńbegi sińgen mádenıet qaıratkeri, grafık, QR sýretshiler odaǵynyń múshesi Abdýahat Muratbaev pen ART SPACE galereıasynyń sýretshileri saldy.
Sonymen qatar, Belarýs, Qyrǵyz respýblıkasy, Tájikstan sýretshileri birigip, ál-Farabı atyndaǵy QazUÝ janynda plener jasaǵan edi.
Qaladaǵy №2 vokzal mańynda músinshi Tamıla Mamatovanyń «Keoker» skýlptýrasy boı kóterdi. Bul - qyrǵyzdyń ulttyq sýsyn ishetin ydysy. Qazaqtyń saba, torsyq, bulqynshaǵyna uqsaıdy.
